Një përleshje fizike ka ndodhur sonte rreth orës 19:30 në rrugën “Anton Çeta” në Prishtinë, ku disa persona janë përfshirë në incident.

Zëdhënësi i Policisë për Rajonin e Prishtinës, Enis Pllana, konfirmoi për Sinjalin se një person dyshohet se është lënduar me mjet të mprehtë dhe ka pranuar trajtim mjekësor.

Policia ka dalë në vendin e ngjarjes dhe ka ndërmarrë veprimet e nevojshme, ndërsa në koordinim me Prokurorin e Shtetit po zhvillohen procedurat e mëtejshme hetimore.

“Sot rreth orës 19:30, në rrugën “Anton Çeta” në Prishtinë, disa persona janë përfshirë në një përleshje fizike. Sipas informatave fillestare, një person dyshohet se është lënduar nga një mjet i mprehtë dhe i njëjti ka pranuar tretman mjekësor. Lidhur me rastin, njësitet policore kanë ndërmarrë veprimet e nevojshme, ndërsa në koordinim me Prokurorin e Shtetit po zhvillohen procedurat e mëtejme hetimore”, tha ai.