LAJMI I FUNDIT: Një person lëndohet rëndë në vendin e punës

Një incident i rëndë në vendin e punës ka përfunduar me lëndimin e rëndë të një punëtori ndërtimi, duke ngritur shqetësime për sigurinë në punishtet ndërtimore.

Ngjarja ka ndodhur në Gjilan, në një objekt në ndërtim në kuadër të Spitalit Rajonal në rrugën “Idriz Seferi”, ku një punëtor është rrëzuar nga një lartësi prej rreth 3 metrash gjatë kryerjes së punimeve.

Si pasojë e rrëzimit, ai ka pësuar lëndime të rënda trupore dhe është dërguar menjëherë për trajtim mjekësor, ku edhe është mbajtur në repartin e ortopedisë për trajtim të mëtejshëm.

Në vendin e ngjarjes kanë dalë njësitë e krim-teknikës si dhe Inspektori i Punës, të cilët kanë nisur procedurat për sqarimin e rrethanave të këtij incidenti.

Me urdhër të prokurorit kujdestar, rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, ndërsa hetimet janë duke vazhduar. /PodujevaSot