Ekskluzive: Kjo është gruaja e arrestuar për skandalin me patentë-shoferë

Një aksion i zhvilluar sot nga organet e rendit ka rezultuar me arrestimin e katër personave të dyshuar për përfshirje në veprimtari kriminale që lidhen me procesin e pajisjes me patentë-shoferë.

Burime të sigurta të Sinjalit bëjnë të ditur se në mesin e të arrestuarve është edhe ekzaminerja Vjollca Lajqi, e angazhuar nga Ministria e Infrastrukturës dhe Transportit.

Të dyshuarit përballen me akuza serioze, përfshirë: marrje ryshfeti, falsifikim të dokumenteve zyrtare, keqpërdorim të detyrës zyrtare

Sipas informacioneve fillestare, dyshohet se përmes ryshfetit është manipuluar procesi i testimit për patentë-shoferë, duke dëmtuar rëndë integritetin e sistemit.

Nga ana tjetër, Ministria e Infrastrukturës dhe Transportit ka reaguar menjëherë, duke e mirëpritur aksionin dhe duke shprehur gatishmëri të plotë për bashkëpunim me organet e drejtësisë.

“Nuk do të ketë kompromis në luftën kundër korrupsionit. Jemi të vendosur të garantojmë transparencë, integritet dhe besim në institucionet publike,” thuhet në reagimin zyrtar.

Hetimet lidhur me këtë rast janë në zhvillim, ndërsa pritet që në ditët në vijim të dalin detaje të reja që mund të thellojnë edhe më shumë skandalin.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.