Vdes profesori i njohur nga Podujeva (FOTO)
Ka ndërruar jetë sot profesori i njohur nga Podujeva, Murat Bejta.
Kështu ka njoftuar në një postim në Facebook, kryetari i komunës së Podujevës, Shpejtim Bulliqi.
Bejta kishte qenë profesor i gjuhës frënge në Universitetin e Prishtinës, e po ashtu kishte punuar edhe në Universitetin e Sorbonës në Paris dhe në Universitetin Poatje të Francës.
Shkrimi i Bulliqit:
Me pikëlloi lajmi për ndarjen nga jeta të profesorit e intelektualit, Murat Bejta. Murat Bejta ka punuar si profesor i gjuhës frënge në Universitetin e Prishtinës, Universitetin e Sorbonës në Paris dhe në Universitetin Poatje të Francës.
Kontributi i tij ishte shumë dimensional, ai e shkroi edhe fjalorin frëngjisht-shqip dhe e udhëhoqi ekipin për hartimin dhe redaktimin e fjalorit të fjalëve të huaja në gjuhën shqipe.
Profesor Murat Bejta ishte nga fshati Zhiti i Komunës së Podujevës. Me vdekjen e tij ai la pas vetës trashëgimi shumë të madhe pedagogjike e profesionale, siç ishte i madh edhe angazhimi i tij për çështjen kombëtare.
Ju shpreh ngushëllime të sinqerta familjes e farefisit dhe të gjithë nxënësve e kolegëve të të ndjerit!
