Është ndaluar një grua në Lipjan për shkak të dyshimit se e ka lajmëruar rrejshëm burrin e saj për dhunë në familje në vitin 2021, me ç‘rast ky i fundit është shpallur fajtor nga Gjykata kompetente, raporton teve1.info.
Sipas komunikatës së Prokurorisë, e dyshuara ka raportuar më 21 prill 2021 tek organet e rendit për dhunë në familje nga bashkëshorti i saj.
Kurse bashkëshortit i saj në po të njëjtin vit ka ushtruar kallëzim penal për lajmërim të rremë nga gruaja.
Megjithatë, ky i fundit është shpallur fajtor për veprën në fjalë.
“Dyshohet se e njëjta ka bërë raportim të rremë pranë organeve të rendit, dhe atë më 21.04.2021, kundër bashkëshortit të saj, për veprën penale dhunë në familje, ndaj të cilit është zhvilluar procedurë penale dhe i njëjti është shpallur fajtor me vendim të Gjykatës kompetente.
Ndërsa, bashkëshorti i saj ka ushtruar kallëzim penal kundër të dyshuarës, për shkak të lajmërimit apo kallëzimit të rremë në polici, në vitin 2021 (rasti i lartcekur) dhe se në incizimin të cilin e posedon Prokurori i Shtetit, i ofruar si dëshmi nga tani i dëmtuari, e njëjta e pranon se në vitin 2021 ka gënjyer organet e hetuesisë me qëllim të përfitimit të dobisë pasurore për vete”, thuhet në komunikatë.
Prokurori i Shtetit ka paraqitur kërkesë për caktimin e masës së arrestit shtëpiak ndaj të dyshuarës, në Gjykatën kompetente.
