Tahiri: Qeveria sot u dha goditjen më të madhe zyrtarëve publik

Shefi i Grupit Parlamentar të Kosovës, Besnik Tahiri, ka thënë se sot Qeveria e Kosovës u ka dhënë një goditje të madhe zyrtarëve publikë, raporton Gazeta10.

Tahiri ka thënë se sot katër Amandamentet e propozuara nga ai në Komisionin për Administratë janë refuzuar nga Qeveria e Kosovës.

Më tej, ai ka thënë se me këtë rast është humbur shpresa për meritokraci dhe karrierë profesionale.

Tutje, ai ka përmendur specifikisht edhe amandamentet e propozuara duke i shpjeguar po ashtu.

Këtu keni postimin e plotë:

“Shuhet shpresa e zyrtarëve publikë për meritokraci dhe karrierë profesionale!

Sot, katër Amandamentet e propozuara nga unë në Komisionin për Administratë u refuzuan nga Qeveria, duke ua dhënë goditjen më të madhe zyrtarëve publikë në administratën shtetërore, njëherësh duke ua humbur shpresën për meritokraci dhe karrierë profesionale.

Propozimet ishin konkrete: Nenet 44 dhe 46 për procedurat e emërimit të nëpunësve të ulët dhe të mesëm drejtues, propozoj të rishkruhen tërësisht dhe të kthehet rregullimi siç është tani në Ligjin për Zyrtarët Publikë. Pra, të kthehet sistemi i karrierës, lëvizjes brenda kategorisë dhe ngritjes në detyrë siç është tek neni 38 dhe 39 i ligjit aktual në fuqi.

Tek rekrutimi i pozitave të nivelit të lartë drejtues, te neni 47, lista fituese të përbehet nga tre kandidatë që kanë fituar më së shumti vota nga pragu prej 70%, por jo të gjithë kandidatët mbi 70%. Përzgjedhja në parim të bëhet e kandidatit që ka fituar më së shumti vota, e nëse përzgjidhet kandidati i dytë ose i tretë, të kërkohet arsyetimi me shkrim, me qëllim të sigurimit të parimit të meritokracisë;

Ndërsa, te Ligji i Pagave propozova që tek neni 9 i projektligjit të shtohet një paragraf i ri, 9.3 vlera e koeficientit të jetë 129 euro. Varësisht nga lëvizjet buxhetore për vitet e ardhshme vlera e koeficientit të rritet”, ka shkruar Tahiri në llogarinë e tij në Facebook. / Gazeta10