Eskalon konflikti verbal mes dy të rinjve, bëhen llom mes vete

Përleshjet mes qytetarëve tashmë janë bërë të zakonshme në vendin tonë.

Pothuajse çdo ditë raportohet për sherre të ndryshme, motivet e të cilave shpesh dalin të jenë banale, raporton Gazeta Sinjali.

Një konflikt verbal ka eskaluar në dhunë fizike mes dy të rinjve dje në rrugën ’28 Nëntori’ në Prishtinë.

Burimet e Gazetës Sinjali kanë bërë me dije se njësitë policore me të marrë informatën kanë dalë në vendin e ngjarjes, ku kanë kapur në flagrancë dy të dyshuarit të cilët u përfshinë në rrahje.

Gjatë kontrollit të tyre, te 22-vjeçari është gjetur dhe sekuestruar një mjet i mprehtë, thikë.

Ndërkohë dy të dyshuarit janë arrestuar dhe janë shoqëruar në stacion policor për intervistim.

Pas përfundimit të procedurave policore, Prokurori i Shtetit ka nxjerrë aktvendim që ndaj të dyshuarve të iniciohet rasti për veprën ‘Sulm’. 22-vjeçari do të hetohet edhe për veprën ‘Mbajtje në pronësi, kontroll ose posedim të paautorizuar të armës’.