LAJMI I FUNDIT: Ministri Aliu tregon edhe sa vjet do të përfundojë rruga Podujevë – Prishtinë

Ministri i Mjedisit, Planifikimit Hapësinor dhe Infrastrukturës, Liburn Aliu, së bashku me zëvendësministri Hysen Durmishi,  dhe kryetarin e Podujevës, Shpetim Bulliqi, kanë mbajtur sot një konferencë për media.

Ata aty kanë folur rreth punimeve që kanë mbetur ‘zvarrë’ tash e sa kohë në rrugën, Podujevë-Prishtinë.

I pyetur nga gazetarët se kur pritet të përfundojë kjo rrugë, ministri Aliu, ka thënë se punimet parashihen të zgjatin maksimumi tri vite.

Ministri Aliu tha se ka thënë se kanë marrë deklaratën për disponueshmërinë e mjeteve nga ministri i Financave, Hekuran Murati lidhur me projektin e rrugës Podujevë-Prishtinë.

Sipas tij, në total në Ligjin e buxhetit për këtë rrugë janë 22.3 milionë euro. Ministri shtoi se problemet që i kanë pasur me këtë rrugë tashmë janë zgjidhur.

“Pra jo më vetëm pjesa e rrugës nga Lluzhani e deri në Podujevë, po edhe pjesa e rrugës nga Lluzhani deri në hyrje të Prishtinës, respektivisht në fshatin Bërnicë. Segmenti do të jetë pesë lote, 16 km nga Lluzhani deri në Bërnicë do të jete e ndarë në  katër lote dhe shtoi se loti i pestë është përfundimi i rrugës nga Lluzhani deri në Podujevë, që përbën segmentin prej 9 kilometrash”, tha ai.

Kryetari i Podujevës, Shpetim Bulliqi tha se ndjehet i lumtur që janë ndarë mjetet për t’i përfunduar punimet, raporton EO.

“Kënaqësi që sot pe ndajmë një lajm të mirë për qytetarët tanë. Sigurimi i mjeteve besoj shumë që kjo ka ndodhur falë ministrisë me hartimin që e kanë bërë të planit. Besoj shumë që këtu do të kenë kompani serioze që do të përzgjidhen”.