Mërgimtari hedh gaz brenda restorantit – 20 persona bëhen për spital (VIDEO)

Në orët e pasmesnatës klientëve të një restoranti në Gjilan, kafja dhe muhabeti ju mbeti në gjysmë.

Furishëm pothuajse të gjithë mysafirët e restorantit u larguan duke u kollitur dhe duke e mbyllur gojën dhe hundën, ngase dyshohet se dikush hodhi një lloj gazi.

Këtë e konfirmon edhe policia e Gjilanit. Pos organeve të rendit edhe urgjenca e qytetit u ftua për ta marrë një qytetar dhe për ta transferuar më pas në emergjencën e Spitalit të Gjilanit, njofton Klan Kosova.

Në këtë të fundit morën trajtim edhe 20 të tjerë të cilët kishin kërkuar ndihmë mjekësore pothuajse në të njëjtën kohë. Në  mesin e tyre edhe tre punonjës të restorantit.

Sipas drejtuesit të emergjencës Begush Canaj, të gjithë pacientët kanë pasur simptoma të ngjashme – kokë-dhimbje, frymë-nxënie, lodhje dhe kanë pasur gjendje paniku dhe të frikës.

Të gjithë janë trajtuar me terapi infuzive dhe me oksigjeno-terapi, ku më pas janë liruar për në shtëpi me gjendje të mirë shëndetësore.

Lidhur me rastin policia ka prangosur tre persona. Dy nga ta tashmë janë liruar. Televizioni merr vesh se i dyshuari kryesor është mërgimtar për të cilin prokurori i shtetit ka shqiptuar masën e ndalimit prej 48 orëve nën dyshimin për kryerjen e veprave si “Armëmbajtje pa leje” dhe “Shkaktim të rrezikut të përgjithshëm”.

Forcat e rendit kanë arritur ta sekuestrojnë edhe llojin e gazit si provë materiale.