Arrestohet një person në këtë fshat të Podujevës
Konfliktet mes vëllezërve në qytetet e ndryshme të vendit, shpesh herë përfundojnë me sharje e ofendime ndaj njëri-tjetrit.
Ata madje shpesh herë eskalojnë në kërcënime e përleshje fizike, duke u dashur kështu intervenimi i Policisë për të zgjidhur telashet, raporton Gazeta Sinjali.
Një rast i tillë ka ndodhur dje në fshatin Balloc të Podujevës, ku një person dyshohet se ka kanosur seriozisht vëllain e tij më të madh.
Sinjali mëson se një person dyshohet se pas një mosmarrëveshje ka kërcënuar vëllain e tij me bisht të sëpatës.
Përballë kësaj situate, viktima ka denoncuar rastin në Polici, ku është shprehur i shqetësuar nga veprimet e vëllait të tij.
Si rezultat i denoncimit, i dyshuari është arrestuar dhe është shoqëruar në stacion policor për intervistim.
Me urdhër të prokurorit, ndaj tij është iniciuar rasti për veprën penale ‘Kanosje’ dhe ai është dërguar në mbajtje.
