Vrasje në tentativë: Persona të panjohur gjuajnë me armë zjarri në drejtim të dy të rinjve

Një ngjarje e rëndë ka ndodhur mbrëmë pas mesnate në rrugën ‘Bajram Bahtiri’ në Prishtinë, ku disa persona ende të paidentifikuar kanë shtënë me armë zjarri në drejtim të dy të rinjve, raporton Gazeta Sinjali.

Burimet e Gazetës Sinjali brenda Prokurorisë kanë bërë me dije se nga rasti nuk ka pasur pasoja në njerëz, mirëpo predha e plumbit ka goditur veturën e cila ishte në lëvizje dhe brenda së cilës ndodheshin viktimat.

Njësitë policore kanë dalë në vendin e ngjarjes, por nuk kanë gjetur asnjë gëzhojë të armës që dyshohet se u përdor në rast, teksa është sekuestruar për ekzaminim vetura e viktimave.

Bazuar në dëshminë e dy 20-vjeçarëve, personat e dyshuar menjëherë pas kryerjes së veprës janë larguar në drejtim të panjohur.

Me urdhër të prokurorit, rasti është cilësuar ‘Vrasje e rëndë në tentativë’, ndërsa veprimet tjera ligjore do merren posa të kapen të dyshuarit.