Disa persona raportohet të jenë shtrirë në Klinikën Infektive të Qendrës Klinike Universitare të Kosovës në një ditë të vetme.

Siç ka mësuar Klankosova.tv, janë rreth 30 persona që kanë shfaqur simptoma të helmimit nga ushqimi.

Këto probleme shëndetësore, atyre dyshohet se u janë shfaqur pas konsumimit të ushqimit në një qebaptore në lagjen Kodra e Trimave të Prishtinës.

Redaksia ka kontaktuar me U.D. Drejtorin e Klinikës Infektive, Arben Vishaj, për të mësuar më shumë rreth këtij rasti, mirëpo i njëjti nuk ka pranuar të japë informacione.

Blerim Lunjin, inspektor sanitar në Agjencinë e Ushqimit dhe Veterinarisë, e ka konfirmuar rastin për dyshime për helmim.

Po ashtu, ai tha se qebaptoren në fjalë e kanë mbyllur dhe janë në pritje të rezultateve të analizave.

“Është mbyll lokali, janë marrë strishot edhe mostrat e ushqimit, dhe në momentin që dalin rezultatet, të hënën e kuptojmë se a ka elemente helmimit”, ka thënë Lunji.

Klani ka mësuar se rasti është raportuar edhe në Policinë e Kosovës. Por, redaksia nuk ka arritur të marrë një konfirmim nga ky institucion, ndonëse ka kontaktuar zyrtarët për informim. Po ashtu, është dërguar edhe email në adresën elektronike të Policisë së Kosovës, nga e cila ende nuk kemi pranuar përgjigje.

Redaksia ka tentuar të kontaktojë edhe me lokalin ku dyshohet se ka ndodhur ky rast, por që numri i vënë në dispozicion në faqen e tyre në Facebook nuk ka qenë i qasshëm.

Një ekip i televizionit Klan Kosova ka qenë edhe në Klinikën Infektive, por që askush nga përgjegjësit nuk ka pranuar të flasë për rastin