Të hënën, në Baicë të Lipjanit është gjetur një trup i pajetë i groposur në një arë të këtij fshati.

Viktima i cili u gjet ishte Enver Bajraktari, i cili ishte raportuar i zhdukur nga familja e tij pak ditë më parë.

Sot, ka përfunduar edhe raporti i autopsisë dhe është bërë identifikimi i plotë ku del të konfirmohen raportimet se trupi i pajetë ishte Enver Bajraktari.

“Lidhur me pyetjen tuaj ju njoftojmë, se me datë 05.08.2025 është bërë identifikimi i plotë dhe ishte Enver Bajraktari, është kryer autopsia dhe janë në proces intensiv hetimet në këtë çështje. Por detaje më të hollësishme nuk mund të japim në këtë fazë të hetimeve”, ka thënë zëdhënësja e Prokurorisë Themelore në Prishtinë, Kaltrina Shala.

Familjarët e tij, saktësisht një i afërm i tij Besnik Bajraktari, u tha gazetarëve ditën e martë se i ndjeri një ditë më parë kishte dalë për të kullosur lopën dhe nuk ishte kthyer më.

“Rreth orës 16:00, familjarët e kanë lëshuar lopën për të kullotur, ndërkaq rreth orës 17:30 – 18:00, lopa është kthyer te shtëpia, por pa çobanin. Kanë tentuar të kontaktojnë me të, por nuk kanë mundur të kenë kontakt. Kanë pyetur edhe te miqtë e afërt, por nuk është gjetur askund. Kur kanë parë që nuk është askund, ka filluar i gjithë fshati të kërkojë”, tha ai.

Ai tutje tregon se si kanë ndjekur gjurmët e tij.

“Lokacioni është vëzhguar përmes shtëpisë së vëllait të tij dhe është zbuluar se lëvizja e fundit e tij ka qenë te ajo shtëpia e vogël. Në bazë të kësaj, kanë filluar kërkimet në terren. Djemtë që kanë ardhur, e kanë kërkuar përmes shkopit që përdorej për të ruajtur lopën. Aty kanë parë që kishte zvarritje në kallamoq. Më pas, përmes atyre gjurmëve, kanë shkuar më tutje. Kur kanë parë dheun e sapo vendosur dhe misrin e mbjellë sipër tij, është kuptuar se bëhej fjalë për një varr të mundshëm. Kur është hapur varri, është gjetur dërrasa dhe është parë se brenda ishte kufoma e një njeriu. Nuk dihet ende saktësisht, pasi duhet të merret forenzika… Nuk dihet, pasi nuk supozohet që ka pasur ndonjë gjë”, tha ai.

Ndryshe, prokuroria konfirmoi ditën e martë se trupi kishte qenë i freskët në momentin kur është gjetur.