Postimi i Lumir Abdixhikut:

Ju faleminderit!
Ju faleminderit që i dhatë kaq shumë mbështetje ndryshimit tonë! Tubimi i madh i hapjes ishte madhështor, përplot energji, ishte mrekulli!

Nga sonte jemi të bashkuar!
Nga sonte qëndrojmë të fortë!
Nga sonte dalim me bindje të plotë se ‘Ne jemi ndryshimi’ për Kosovë!

9 shkurti është fati ynë.
9 shkurti është thirrja jonë!
9 shkurti është fitorja jonë!

#LDK124

FJALA IME E PLOTË

Të dashur qytetarë të Republikës,
Mbështetës të kësaj shtëpie të madhe të demokracisë e kulturës politike,
Mbështetës të ndryshimit historik,
Zonja e zotërinj,

Mirë se vini në tubimin më të madh elektoral në vend. Mirë se vini në shtëpinë e të djathtëve, në shtëpinë e lirisë, në shtëpinë e pavarësisë, në shtëpinë e vet demokracisë!

Mirë se vini në Tubimin e Hapjes së fushatës, në tubimin e ndryshimit, në tubimin e nisjes së uraganit të madh të fitores së 9 shkurtit.

Jemi mbledhur në një vend.
Të gjithë në një vend, me një ide, nën një himn e nën një zotim.

Nga Dukagjini deri në Llap,
Nga Anamorava deri në Shalë,
Nga Ana e Drinit dteri në Sharr,
Ne jemi Lidhja Demokratike e Kosovës,
Ky është rrugëtimi ynë për ndryshim!

Jemi mbledhur sonte këtu, jo vetëm si pjesëtarë të një Lidhje të fortë politike, por si një shtëpi e bashkuar e njerëzve që ëndërrojnë për Republikën tonë, të ardhmen tonë, të ardhmen e një vendi që duhet të qëndrojë krenar, të qëndrojë i fortë, të qëndrojë prijetar!

Sonte, shënojmë fillimin e një kapitulli të ri për Kosovën! Sonte shënojmë një moment definues të historisë së popullit tonë! Sonte, shënojmë kryengritjen e djathtë kombëtare – si thirrje monumentale e popullit të Kosovës!

Dhe ju them, ju premtoj, zotohem, se çfarë kemi nisur sot këtu, do të kushtrojë fort e do të mbahet në mend gjatë, jo vetëm gjatë këtij muaji elektoral, por do të kushtrojë fort e gjatë, për gjenerata të tëra që do të vijnë pas.

Do të shikojmë me mburrje në këtë 11 janar, e do të kuptojmë, se ndryshimi i shkurtit nisi mu në këtë sallë! Nga kjo sallë LDK është ngritur në këmbë!

Është ngritur në këmbë për t’u mos u ndalur.
Sepse kur LDK ngritët në këmbë, s’ka asgjë që e ndanë, s’ka asgjë që e ndalë!

Sonte, jam para jush, jo vetëm si kryetar i katërt i Lidhjes Demokratike të Kosovës, jo vetëm si kandidat për kryeministër i lëvizjes më të madhe kombëtare, sonte jam para jush si bir i kësaj toke, si një prind me ëndrra të mëdha për fëmijët e tij e fëmijët e Kosovës, mbi të gjitha, sonte jam para jush si një qytetar që refuzon të pranojë zymtësinë e vendit tim si normalitet të kohës!

Le t’i kujtojmë vet se kush jemi ne!
Jemi pasardhësit e qëndresës, jemi pasardhësit e rezistencës! Jemi pasardhësit politik të shqiptarit më të madh të kohërave, jemi pasardhës politik të Dr. Ibrahim Rugovës.

Dhe para vetes, në këtë rrugë të re, kemi një kushtrim, një detyrë, një obligim, të ëndërrojmë shumë, të luftojmë fort, të fitojmë me dinjitet për Republikën tonë! Në fjalë të atit themeltar të Kosovës:

“Kosova, shtet i pavarur e sovran, i anëtarësuar në NATO e BE, e me miqësi të përhershme me SHBA-të”, ishte projekti ynë dje, është projekti ynë sot, do të jetë projekti ynë nesër.

Ky projekt na thërret sot.
Këtij projekti i përgjigjemi sot.

LDK e njëjtë!
Besimtarë të njëjtë! Mision i njëjtë historik!
Zonja e zotërinj,

Zgjedhjet për LDK-në, janë dhe kanë qenë gjithmonë festë e demokracisë dhe tolerancës. Këtë herë, po hymë në festë të madhe të demokracisë nën sanksione të Perëndimit.

Për një kohë të gjatë kemi parë vendin tonë, shtetin tonë të ndërtuar me plot mund, teksa humbet mundësitë e destinuara nga historia, teksa zhytet në ndarje, përçarje e zymtësi të brendshme.

Në këtë ndarje e përçarje, në këtë urrejtje kaq të madhe të brendshme, ne shikojmë te tjetri jo shtyllën e forcës e bashkimit, jo mikun, fqinjin e bashkëqytetarin me të cilin ndajmë të njëjtat halle, të njëjtat brenga, të njëjtat fate – nën një tokë, nën një qiell, nën një atdhe; por shikojmë kundërshtarin që duhet ta mundim e mposhtim me çdo çmim. Ta shtypim e poshtërojmë thuajse s’kemi kundërshtarë të tjerë të jashtëm bashkërisht!

Kësaj marrëzie kolektive duhet t’i dalim në ballë të gjithë! Kjo nuk është Kosova jonë. Kjo nuk është sjellja jonë. Kjo nuk është ëndrra jonë!

Prandaj sot nuk qëndroj para jush as për të nxitur urrejtje për tjetrin, e as për të ju mbushur plot helm e vrer për tjetrin. Të ju ndajë në tradhtar e patriot, me mua apo me Serbinë.

Sot qëndroj para jush t’ju them se nuk ka Kosovë të partive. Nuk ka Kosovë të individëve. Nuk ka Kosovë të epokave! Ka një Kosovë dhe një Kosovë të vetme, ka një ëndërr dhe një ëndërr të vetme, ka një adresë dhe një adresë të vetme, ka një atdhe dhe një atdhe të vetëm.

Republika jonë është vetë ëndrra jonë! Ndryshimi sot, është misioni jonë!

Në Republikën tonë Kryeministri nuk vendoset mbi prokurorinë, Kryeministri nuk mbron hajninë! Në Republikën tonë pushteti nuk sulmon mediat, gazetarë e fjalën e lirë. Jemi popull i lirë, e duam lirinë, do ta mbrojmë lirinë!

Në Republikën tonë propaganda nuk zëvendëson realitetin me tabela fiktive përplot mashtrime. Në Republikën tonë, tabela e vetme është ajo e familjeve kosovare që jetojnë, punojnë e përpiqen për një jetë të dinjitetshme e të ndershme.

Në Republikën tonë, Qeveria nuk e shkelë Kushtetutën 10 herë për t’u mburrur e jo skuqur 10 herë; e hajnia, vjedhja e krimi nuk maten me kutin e krahasimit me të shkuarën, se a janë më shumë apo më pak se dikur, por dënohen sepse hajnia është hajni, vjedhja është vjedhje, e futja e duarve në bukën e Kosovës do të dënohet edhe para vendit, edhe para Zotit, edhe para shtetit!

Prandaj, le t’u themi qartë, le t’u themi thjeshtë, le t’u themi zëshëm nga kjo sallë nëpër çdo cep të Kosovës, le t’u themi cep më cep:
Paratë e vjedhura do t’i ktheni cent më cent!
Cent më cent!

Sepse 9 shkurti po vjen. Ndryshimi po vjen.
Dhe ora e madhe e ndryshimit ka nisur numërimin prapa!

Ky numërim, na sjellë tek e vërteta. Tek e vërteta e popullit të Kosovës. Dhe këtë të vërtetë, e kam gjetur mes njerëzve tanë. E kam gjetur mes atyre që të lënë në mëshirën e fateve ditore, u janë humbur të gjitha shpresat nga ata që ua përbuzën të gjitha kërkesat!

Për katër vite të shkuara kam qëndruar me ta.
I kam dëgjuar ata, i kam takuar ata, i kam parë ata.

Kam parë përpjekjen fisnike të familjeve kosovare për t’ia dalë një muaji deri në fund; me paga që nuk ju rriten përballë çmimeve që ju fluturojnë. Dhe në gjithë këtë përballje, ata duhet të shpresojnë se një ditë, një qeveri, zgjohet mbarë e mirë dhe vendos t’u ndajë ndonjë ndihmesë si lëmoshë – varësisht nga teket, varësisht nga qejfet – për të mos thënë varësisht nga zori!

Kam parë dhe përpjekjen e fëmijëve tanë për dije në shtetin e fundit të dijes në botë. E ardhmja e popullit tonë na mbetet peng i fëmijëve që pa faj të tyre kapërcejnë në sistemin e fundit edukativ në këtë kohë! Mos të harrojmë, për çdo ditë që i vështrojmë kështu dhe nuk ndërmarrim asgjë, për çdo ditë u humbasim padrejtësisht të ardhmen që mund ta kishin përgjithmonë!

Prandaj duhet të veprojmë sot.
Për fëmijët, pasurinë më të madhe të kombit tonë!

Kam parë dhe betejën e familjeve të shumta kosovare, që në hallet më të mëdha shëndetësore, duhet të bredhin nëpër rajon e botë për një kujdes të denjë shëndetësor! Sepse shteti i tyre, shteti jonë, nuk u jep as kaq pak, sikurse kujdesi për shëndet – gjënë më të shtrenjtë në jetë!

Kam parë dhe betejën e pensionistëve për të mbijetuar me një pension; teksa nisin të konsiderojnë veten edhe tepricë të shoqërisë. U them atyre të ndihen krenarë, sepse para vetes, për ne, kanë projektin më të madh historik, vet shtetin e Kosovës, vetë Republikën tonë. Kjo Republikë, 30 ditë nga sot, do të ndaj çdo të mirë me ata që e bënë atë!

Kam parë dhe betejën e punëtorëve kosovarë, që përkundër kushteve të rënda, përkundër pagave të ulëta, përkundër pasigurisë në punë, janë punëtorët më të mirë, më të zot, më të fortë se secili punëtor tjetër nëpër Evropë! Janë forca jonë kombëtare drejt zhvillimit, progresit e prosperitetit!

Kam parë dhe betejën e ndërmarrësve e inovatorëve që nuk kanë projekte zhvillimore në shtetin që i konsideron si shkatërrimtarë të vetmit që krijojnë! Në shtet, shtetin e tyre, në qeveri, në qeverinë e tyre, të njëjtit duhet të gjejnë partner, mbështetës e mbrojtës – sikurse secili ndërmarrës tjetër kudo nëpër botë!

Kam parë përpjekjen e mësuesve, mjekëve, zjarrfikësve, shërbyesve publik, kam parë përpjekjen e policëve, ushtarëve, përpjekjen e sportistëve e artistëve e secilit tjetër në këtë shoqëri, që e bën atë çfarë ne quajmë sot Kosovë. Kam parë, mbi të gjitha, betejën e atyre të lënë në harresë e nevojë!

Të gjithë këta, shtetin e kanë, por shteti nuk është për ta. Më 9 shkurt, shteti kthehet te ta!

Atyre që ndihen të harruar u them: Ju dëgjojmë.
Atyre që ndihen të anashkaluar u them: Ju shohim.
Atyre që ëndërrojnë për një të nesërme më të mirë ju them: Këtë të ardhme do ta bëjmë!

Prandaj sot, mbi të gjitha, nuk qëndroj para jush te them se jemi te varfër.
Të ju ftoj në dorëzim e ankesa. Sepse ankesat janë për të dobëtit, puna është për të fortit!

Sot qëndroj para jush me zotimin për një ambicie të madhe. Një që ju fton juve dhe secilin tjetër të besojnë në Kosovë. Ky vend i pasurive përrallore, i njerëzve të shkëlqyeshëm e familjeve punëtore, ka një tregim të bukur përpara. Ky tregim na vjen si thirrje e gjyshërve tanë e si detyrim ndaj fëmijëve tanë. Ky tregim na thërret që të bëhemi të barabartë mes popujve e kombeve evropiane.

Sot, nuk jam këtu të jap zotime të mëdha që s’bëhen kurrë. As t’u ndërtojë një shpresë që do ta thyej më pas pa asnjë ndjenjë. Nuk jam këtu tu ju flasë për një çerek shekulli të shkuar, por për të ardhmen që varet nga ne. Dhe në këtë projektim të së ardhmes dua të jem i vërtetë me ju.

Jo të ju premtoj Bashkim Kombëtar e t’ju sjellë Autonomi. As të premtoj zhvillim përrallor e të përfundojë me një urë dy metërshe. Jo të ju premtoj rend e drejtësi për të përfunduar në vjedhje e kapje.
Integrim e njohje për të marrë izolim e sanksione.

Sot jam këtu të ju flas për të ardhmen që i pret veprimet tona.

T’ju flas për një Kosovë, që e ëndërrojmë si qytetarë të lirë të një vendi fisnik, me histori sa të shenjtë aq dhe plot sakrificë.

Unë besoj në shtetin e Kosovës dhe potencialin e jashtëzakonshëm që ky vend i bekuar me njerëz të shkëlqyeshëm ka! Dhe vizioni im nuk ka të bëjë vetëm me një Kosovë të suksesshme, por me qytetarë të suksesshëm në një Kosovë që ecë mbarë!

Njerëz që mund t’i ndjekin ëndrrat e tyre, të jetojnë me dinjitet, të jetojnë drejtë, të ndërtojnë të ardhmen e tyre mu këtu, në shtëpitë e tyre, te familjet e tyre, në qytetet e fshatrat e tyre!

Dua ta shoh Kosovën jo si të fundit në rajon, por si një vend krenar dhe prijetar mes të tjerëve përreth, si një shtet ku mirëqenia, mundësia e uniteti nacional janë pjesë e përditshmërisë sonë!

Prandaj dhe në programin tonë politik, kemi 5 miliardë euro investime, me 5 miliardë euro buxhet e me 5% rritje ekonomike!

Ambicia jonë është edhe e drejtë, është edhe mundshme, është edhe e guximshme!

Dhe në këtë ambicie, ne kemi zotime që garantojnë jetë të mirë në Kosovë. Prandaj, që në javën e parë, që në javën e parë dhe asnjë javë tjetër më shumë, të gjithë shërbyesve publik në Kosovë – të gjithë mësuesve, mjekëve, policëve, zjarrfikësve, ushtarëve, të gjithë punëtorëve të shtetit – do t’u rrisim pagat me koeficient 150!

Koeficienti 150 që në javën e parë është zotimi ynë publik! Për këtë përgjigjemi para vendit, para Zotit, para secilit qytetar të vendit! Nga 200 euro më shumë, secilin muaj – ky është zotimi ynë!

Në Kosovën e territ, të qirinjve e reduktimeve, në Kosovën ku s’ka rrymë sepse paskemi zhvillim ekonomik, në këtë Kosovë ne do të ndërtojmë Centralin e ri me Gaz në Ferizaj! 500 milionë euro investim, për centralin me gaz amerikan; për të dhënë fillimisht furnizim me energji, e më pas dhe energji më të lirë. Sepse për ne, të djathtit, për ne, Lidhjen Demokratike, energjia është edhe ekonomi edhe siguri! Prandaj energji me gaz, prandaj energji me gaz amerikan!

Për të gjithë qytetarët tanë, që bredhin për shërim nëpër botë, për të gjitha familjet tona, këtu në Kosovë, do të ndërtojmë Spitalin e Ri të Kosovës, me plot 500 milion euro investim në të. Spital i ri, lokacion i ri, ndërtesa të reja, pajisje të reja – shëndetësi moderne siç e meriton vendi jonë bukur e përrallor!

Për të gjithë fëmijët e Kosovës, ata që qëndrojnë sot 4 orë në shkollë, Lidhja Demokratike e Kosovës do të sigurojë mësim gjithëditor. Ushqime të ngrohta, klasë moderne, tabela digjitale e mësimnxënie moderne. Sikurse në Prishtinë, fillimisht në 5 komuna e më pas në krejt Kosovën!

Për prindërit tanë, për fëmijët tanë, për familjet tona, LDK do të krijojë për herë të parë Ministrinë e Familjes dhe Mirëqenies, sipas modeleve Perëndimore. Sepse për ne, të djathtit, familja është e shenjtë. Sepse për ne, të djathtit, investimi në familje është investim në Kosovë. Prandaj, për çdo të posalindur në Kosovë, për secilin të posalindur në Kosovë, shteti ynë do t’i mbulojë të gjitha shpenzimet e vitit të parë.

Përveç kësaj, do t’i ndërtojmë plot 80 çerdhe të reja gjithandej Kosovës, me qëllim që çdo fëmijë nga mosha 3 vjeçare të jetë pjesë e sistemit edukativ në Kosovë. Kohë moderne, qasje moderne!

Për të rinjtë tanë, ata që janë në prag të mbledhjes së valixheve e ikjes nëpër botë, kemi Programin Kombëtar për trajnime në teknologji. Plot 40 mijë të rinj e të reja, në katër vjet, do të përfitojnë nga ky program trajnimi, që u jep edhe paga të larta, edhe vende të sigurta edhe qëndrim në Kosovë!

Për sportistët e sportdashësit, LDK do të ndërtojë Qendrën më të madhe Sportive në Kosovë. Në Prishtinë, në Bërnicë, do të ndërtojmë Stadiumin e Ri Kombëtar, Pallatin e Ri Kombëtar, Pishinën Olimpike, e Gaming Hall. Ndërsa, në 5 qytete të tjera, në Gjilan, në Pejë, në Prizren, në Gjakovë e në Ferizaj do t’i ndërtojmë 5 stadiume rajonale të kategorisë 3 dhe 4 të UEFA-s. Në Brezovicë e në Pejë, ndërsa, do t’i ndërtojmë dy komplekset më të mëdha turistike e sportive në Kosovë!

Për artistët, për artdashësit e shijuesit e kulturës, për katër vite do të ndërtojmë kompleksin më të madh kulturor që ka pasur Kosova ndonjë herë. Do të ndërtojmë Teatrin e Operas dhe Baletit Dr. Ibrahim Rugova, Teatrin e Ri Kombëtar, Muzeun e Paqes dhe Rezistencës e Muzeun e Artit Bashkëkohor. Sepse, kultura jonë është vetë identiteti jonë. Promovimi i saj, është obligimi jonë!

Në siguri e mbrojtje, do t’i kemi 10 mijë polic, me polici në bashki – pra polic për secilën lagje në vend; do t’i kemi 6 mijë ushtarë, 4 kazerma të reja e 2 lagje të reja ushtarake. Siguria jonë, mbrojtja jonë, janë detyrat tona! Qeveri e fortë, shtet i fortë! Nga Ibrahim Rugova, dëshmorët dhe martirët, Ushtria Çlirimtare e Kosovës, te Ushtria e Kosovës, sot partnere, nesër forcë e NATO-s!

Do të investojmë mbi 1 miliard euro në infrastrukturë rrugore, nga unaza e kryeqytetit, te përfundimi i të gjitha rrugëve rajonale, magjistrale e autostradave!

Këto, dhe zotimet tjera, janë pjesë e programit tonë Rruga e Re. Janë pjesë e një ëndrre politike që e sheh Kosovën në një të ardhme ndryshe! Një ku puna jonë është matësi ynë, fjalët tona janë veç puna

Për të bërë këtë ëndërr të mundshme, rreth vetes kam një ekip të shkëlqyeshëm. Një ekip me integritet personal. Burra e gra, që kanë ngritur standardin e punës në nivele që të bëjnë krenar. Ata kanë jo vetëm përvojën e jashtëzakonshme në bërjen e punëve mbarë, por mbajnë, para së gjithash, me vete dhe idealin e madh të bërjes së ëndrrave realitet. Bashkëudhëtimi me ta, në këto katër vite ishte privilegj.

Por, të ju prijë atyre, në Qeverinë e ardhshme rugoviste, do të jetë vërtetë nder!

Prandaj, më lejoni t’ju ftoj, për një duartrokitje të madhe, për të gjithë 109 kandidatët pas meje, që në këto zgjedhje, në këtë fushatë, bartin me veti pishtarin e madh të ëndrrës kosovare!

E meqë jemi te falënderimet, më lejoni që nga kjo sallë, të falënderojë të gjithë bashkatdhetarët tanë, që në këto zgjedhje tashmë kanë shënuar fitoren e parë. Sepse, nga 104 mijë të regjistruar nga mërgata, së paku – së paku pra – mbi 40 mijë sosh janë mbështetës e votues të Lidhjes Demokratike të Kosovës.

Fitorja e madhe tashmë ka nisur! Prandaj, ju them të bëheni gati! Ngriteni zërin, të përvilni mangët, ngriten shpresën për të nesërmen dhe rrugën plot dritë përpara!

Ju erdhët. Ju dëgjuat.

Shpërndajeni tani këtë lajm në çdo anë të Kosovës. Në çdo rrugë e rrugicë, në çdo lagje në çdo shtëpi, në çdo anë të Republikës.

Aty ku gjeni sharje, urrejtje e ankim për të shkuarën, jepni vullnet, shpresë e vizion për të ardhmen. Ankesat e frustrimin ua lëmë të frustruarve, punën e të ardhmen e bartim ne.

Aty ku gjeni ndarje, urrejtje e përçarje, jepuni dorën e zgjatur për përbashkim! Jepuni dy gishta të ngritur lart me plot krenari!
Jemi tjetër nivel. Nga 1989 deri më sot!
LIRI, PAVARËSI, DEMOKRACI!

Shpërndajeni tani këtë kushtrim nëpër Kosovë.
Shpërndajeni këtë lajm nëpër çdo anë.

Nga mikpritësit e Pejës së bukur, tek odat e pushkëve të Llapit,
Nga fushat e bukura të Lipjanit, te vreshtorët e Rahovecit e Therandës,
Nga elektricistët e Obiliqit, te minatorët e Trepçës e Mitrovicës,
Nga Çarshia e këngëve të Gjakovës, te bjeshkët e forta të Istogu,
Nga Ferizaji punëtor, te Vushtrria antike,
Nga Prishtina e përjetimeve, tek Prizreni historik,
Nga Drenica heroike, deri te Gryka e Kaçanikut,
Nga familjet punëtore të Gjilanit, Vitisë e Anamoravës,
Te Kullat e Rugovës e malet e Sharrit.

Shpërndajeni kushtrimin e madh se Lidhja jonë është gati. Me të, po nisë, dhe një faqe e ndritur e historisë sonë kombëtare.

Nga sonte jemi të bashkuar!
Nga sonte qëndrojmë të fortë!
Nga sonte dalim me bindje të plotë se ‘Ne jemi ndryshimi’ për Kosovë!

9 shkurti është fati ynë.
9 shkurti është thirrja jonë!
9 shkurti është fitorja jonë!

Unë jam Lumir Abdixhiku i Lidhjes Demokratike të Kosovës, dhe zotohem para jush që do t’ju prijë deri në fitoren e madhe.

Le të festojmë së bashku; le të ringritemi si një.
Le ta bëjmë ndryshimin për këtë Republikë!

Zoti e bekoftë Kosovën,
Zoti e bekoftë Lidhjen Demokratike të Kosovës!