Vjosa Berisha, përfaqësuese e studentëve dhe aktive në Organizatën Studentore “Lidhja e Studentëve”, njoftoi se është zgjedhur si Senatore nga radhët e studentëve në Senatin e Universitetit të Prishtinës.

Në një postim të saj, Berisha shkruan:
“Senati është organi më i lartë akademik i Universitetit dhe përfaqëson instancën kryesore ku merren vendime të rëndësishme për jetën akademike. Është një nder dhe përgjegjësi e madhe për mua të jem një nga zërat studentorë në këtë organ kaq të rëndësishëm.”

Ajo falënderoi veçanërisht Organizatën Studentore “Lidhja e Studentëve” për mbështetjen dhe besimin:

“Ky besim më motivon fuqishëm që të jem zëri i studentëve, duke përfaqësuar interesat, idetë dhe shqetësimet tona me përkushtim dhe integritet. Faleminderit nga zemra për mbështetjen. Së bashku, mund të sjellim ndryshime pozitive në Universitetin e Prishtinës!”

Zgjedhja e Vjosës në Senat shënon një hap të rëndësishëm në përfaqësimin e studentëve dhe tregon angazhimin e saj për të kontribuar në vendimmarrjen akademike dhe zhvillimin e universiteteve.