Një ngjarje e rëndë është shënuar pasditen e së hënës në fshatin Skivjan të Gjakovës, ku një konflikt mes disa personave ka përfunduar me përdorim të armës së zjarrit dhe një person të plagosur.

Sinjali mëson ekskluzivisht se më 04 gusht 2025, rreth orës 16:00, në Spitalin “Isa Grezda” në Gjakovë është paraqitur një person me plagë të shkaktuara nga armë zjarri. Pas njoftimit të Policisë, patrulla dhe Njësia e Hetimeve të Stacionit kanë ndërhyrë menjëherë, duke siguruar vendin e ngjarjes në Skivjan, ku ka ndodhur përleshja.

Nga vendi i ngjarjes janë sekuestruar një armë zjarri (pistoletë), një karikator, katër fishekë dhe një gëzhojë, të cilat dyshohet se janë përdorur gjatë incidentit.

Sipas informacioneve të siguruara ngaSinjali, në rast janë të përfshirë pesë persona: Hazir Stojkaj, dyshohet se ka përdorur armën dhe ndaj tij është iniciuar vepra penale “Vrasje në tentativë”, Salih Tahiraj, Enis Tahiraj, Verona Tahiraj dhe Isa Tahiraj – të gjithë dyshohen për “Pjesëmarrje në rrahje”.

Me urdhër të Prokurorit për Krime të Rënda, Hazir Stojkaj është dërguar në mbajtje për 48 orë, ndërsa katër personat e tjerë janë intervistuar në procedurë të rregullt.

Rasti është në hetim nga Hetimet Rajonale në Gjakovë, dhe priten veprime të mëtejshme në ditët në vazhdim.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.