Ilir Tasholli, i cili deri para një jave ishte kandidat për kryetar të Komunës së Lipjanit nga radhët e Aleancës për Ardhmërinë e Kosovës (AAK), ka bërë një lëvizje të papritur politike. Pas dorëheqjes për “arsye objektive”, sot ai ka njoftuar se i është bashkuar Lëvizjes Vetëvendosje (VV).

Në një postim publik, Tasholli bëri të ditur se këtë vendim e ka marrë bashkë me disa nga përkrahësit e tij:

“Bashkë me disa prej përkrahësve të dashur, sot iu bashkuam Lëvizjes Vetëvendosje e cila më së miri mishëron vullnetin për ndryshim, transparencë dhe zhvillim të qëndrueshëm për Lipjanin dhe për gjithë vendin.

Në këtë rrugëtim të ri, do të jemi në përkrahje të mikut tonë, kandidatit për Kryetar të Lipjanit nga Lëvizja Vetëvendosje, z. Ilir Qeriqi, me të cilin ndajmë vizionin për një qeverisje lokale të ndershme, të përkushtuar dhe të afërt me qytetarët e Lipjanit“, thuhet ndër të tjera në reagimin e tij.

Vetëm një javë më parë, Tasholli kishte njoftuar se po tërhiqej nga kandidatura e AAK-së për Lipjanin:
“Dua t’ju njoftoj se, për arsye objektive, kam vendosur të ndal aktivitetin tim politik brenda Aleancës për Ardhmërinë e Kosovës, të tërhiqem nga kandidatura për Kryetar të Komunës së Lipjanit, si dhe nga të gjitha funksionet që kam ushtruar deri më tani“, kishte deklaruar ai në atë kohë.

Përveç garës për kryetar komune, Tasholli ishte pjesëmarrës edhe në zgjedhjet parlamentare të këtij viti me listën e AAK-së.

Ky nuk është ndryshimi i tij i parë politik. Para vitit 2021, ai ishte pjesë e Lidhjes Demokratike të Kosovës (LDK) dhe ka shërbyer një mandat si deputet nga ky subjekt. Madje, edhe në atë periudhë kishte spekulime se do t’i bashkohej Vetëvendosjes, por ato ishin mohuar publikisht.

“Për të gjithë ata, të cilët po flasin dhe po mendojnë se Ilir Tasholli po largohet dhe po e lë LDK-në për Vetëvendosjen, ne i përgënjeshtrojmë të gjitha këto informacione, duke ju thënë se ai, është pranë LDK-së më shumë se kurrë më parë, i angazhuar duke punuar për fitore”, thuhej në një reagim të faqes së simpatizantëve të LDK-së asokohe.