Një ngjarje tragjike ka tronditur qytetin e Eskişehirit në Turqi, ku një zjarr masiv në zonën pyjore të rrethit Seyitgazi i ka marrë jetën 11 punonjësve të pyjeve.

Ngjarja ndodhi gjatë pasdites të së martës, kur ekipet zjarrfikëse dhe punonjësit e pyjeve ndërhynë për të kontrolluar përhapjen e flakëve.

Sipas autoriteteve lokale, për shkak të erërave të forta dhe temperaturave ekstreme që kanë përfshirë rajonin gjatë ditëve të fundit, zjarri u përhap me shpejtësi të madhe, duke krijuar kushte jashtëzakonisht të vështira për ndërhyrjen në terren, shkruan cnnturk.

Të paktën 11 punonjës mbetën të rrethuar nga flakët në një zonë të pyllëzuar dhe nuk arritën të shpëtojnë, pavarësisht përpjekjeve të kolegëve të tyre.

Pamjet nga vendngjarja tregojnë tym të dendur dhe zjarr të përhapur në një sipërfaqe të madhe pylli, ndërsa zhurma e helikopterëve dhe mjetet e emergjencës dëgjoheshin pa ndërprerje. Skuadrat e ndërhyrjes së shpejtë, përfshirë edhe njësitë ajrore, janë ende në terren për të kontrolluar dhe shuar plotësisht vatrat e zjarrit.

Lajmi për humbjen e jetëve shkaktoi tronditje në opinionin publik dhe solli reagime të menjëhershme nga autoritetet qendrore e lokale. Deputeti i AK Partisë për Eskişehir, Nebi Hatipoğlu, shprehu dhimbjen e tij përmes një deklarate publike.

Ministria e Bujqësisë dhe Pyjeve në Turqi gjithashtu reagoi me një deklaratë, duke konfirmuar humbjen e 11 jetëve dhe duke njoftuar se është hapur një hetim i plotë për të zbuluar shkaqet e zjarrit. Dyshimet paraprake tregojnë se mund të ketë qenë fjala për një zjarr të nisur nga faktorë natyrorë, por nuk përjashtohet as ndonjë neglizhencë njerëzore.

Aktualisht, më shumë se 500 forca zjarrfikëse, punonjës të pyjeve dhe vullnetarë janë të përfshirë në operacionet për shuarjen e zjarrit. Autoritetet kanë bërë thirrje për kujdes të shtuar nga qytetarët dhe kanë ndaluar hyrjen në disa zona pyjore deri në një njoftim të dytë.

Ngjarja në Seyitgazi shënon një nga tragjeditë më të rënda në historinë e shërbimit të mbrojtjes së pyjeve në Turqi në vitet e fundit dhe ka rikthyer në vëmendje rrezikun e madh që paraqesin zjarret në kushte klimatike ekstreme.