Deputetja e Kuvendit të Kosovës nga radhët e Nismës Socialdemokrate, Xhevahire Izmaku do të jetë kandidate për kryetare të Vushtrrisë.

“Zëri i Vushtrrisë” mëson se ajo tashmë ka marrë dritën e gjelbër nga lideri i partisë, Fatmir Limaj, që t’i hyjë garës për të parën e komunës së Vushtrrisë.

Përveç si kandidate nga Nisma, sipas burimeve, Izmaku po shqyrtohet që të jetë emri që do të përfaqësojë edhe Lëvizjen Vetëvendosje, në zgjedhjet lokale të tetorit.

Një gjë e tillë pritet të zyrtarizohet së shpejti, sidomos nga një takim që në vikend do të ketë Albin Kurti dhe Fatmir Limaj.

Përveç diskutimeve për koalicion në nivel qendror, Kurti e Limaj janë duke e shqyrtuar mundësinë që në disa komuna të kenë kandidat të përbashkët për kryetar.

Mbetet të shihet se cili do të jetë epilogu i takimit Kurti-Limaj, por edhe nëse s’do të ketë marrëveshje për bashkim forcash, sipas burimeve, Izmaku do të jetë kandidate e Nismës për kryetare të Vushtrrisë, zyrtarizimi i së cilës pritet të bëhet javën e ardhshme.

Izmaku që dikur ka qenë nënkryetate e Vushtrrisë, do të sfidojë kandidatët e PDK-së dhe LDK-së, Ferit Idrizi dhe Xhafer Tahiri, të cilët tashmë e kanë zyrtarizuar kandidimin.