Një ngjarje e rëndë ka ndodhur sot paradite në fshatin Mullopolc të Shtimes, ku një burrë ka mbetur i plagosur si pasojë e disa të shtënave me armë zjarri, raporton Sinjali.

Burime të besueshme të Sinjalit brenda organeve të rendit bëjnë me dije se rreth orës 11:40 është raportuar një rast tentim vrasjeje në rrugën “Sadik Mujota”.

Viktima është identifikuar si R.P. 38-vjeçar

Sipas informacioneve të para, QKMF-Shtime ka raportuar se një person i plagosur me armë ndodhej në një shtëpi në rrugën “Drita Bytyqi”. Por në momentin që patrullat policore kanë arritur në vendin e ngjarjes, është mësuar se i plagosuri kishte ikur në këmbë në drejtim të rrugës kryesore, ku më pas ishte larguar me një pikap të bardhë, vetëm pak minuta para se të mbërrinte patrulla.

Pas një angazhimi të menjëhershëm, njësi të shumta të Policisë kanë nisur kërkimin dhe pas disa minutash, në rrugën “Haqif Hysenaj”, patrulla e dytë ka arritur ta ndalojë automjetin ku ndodhej i plagosuri. Ai është legjitimuar dhe ka deklaruar se një person i panjohur kishte shtënë katër herë në drejtim të tij me armë zjarri.

Pasi ka marrë ndihmën e parë mjekësore në QKMF-Shtime, i plagosuri është intervistuar nga njësitë hetimore.

Hetimet për këtë ngjarje të rëndë janë duke u zhvilluar nga Njësia e Hetimeve të Stacionit Policor në Shtime në bashkëpunim me Hetimet Rajonale.