Presidenti amerikan Donald Trump ka folur për përpjekjet e tij për të shmangur përplasjen mes Serbisë dhe Kosovës, si dhe për rolin që luajti në uljen e tensioneve në rajon, gjatë një konference për shtyp këtë të premte, raporton Gazeta Sinjali.

Ai theksoi se Serbia dhe Kosova po shkonin drejt një konflikti të mundshëm dhe ndërhyri duke kërcënuar me pasoja ekonomike për të dyja palët.

“Serbia dhe Kosova ishin gati të përplaseshin. Po shkonin drejt një lufte të madhe. U thashë: Nëse përplaseni, nuk ka më tregti me Shtetet e Bashkuara. Ata thanë: Ndoshta nuk do të përplasemi”, tha Trump.

Kjo deklaratë pason një ngjarje të ngjashme me Indi-Pakistanin, ku presidenti amerikan u përpoq të ndalonte një luftë bërthamore mes dy shteteve. Ai tregoi se ka zhvilluar biseda të ngjashme me të dy palët për të shmangur përshkallëzimin e konfliktit.

“Po negocioja me të dyja palët. Dhe i thashë Scott-it, i thashë Howard-it: Anuloni të gjitha marrëveshjet me Indinë dhe Pakistanin. Nuk do të tregtojnë me ne nëse janë në luftë. Ata telefonuan prapë: Çfarë të bëjmë? U thashë: Shikoni, nëse doni tregti me SHBA-të, shumë mirë. Nëse doni të filloni të përdorni armë bërthamore kundër njëri-tjetrit, nuk do ta lejojmë këtë,”, shtoi ai.