Parlamenti gjerman ka mbajtur një seancë speciale për të shënuar 30-vjetorin e gjenocidit në Srebrenicë, ku në korrik të vitit 1995, forcat serbe vranë mbi 8 mijë burra dhe djem boshnjakë. Në sallë ishin të pranishëm dy të mbijetuar, si dhe ambasadorët e Bosnjës dhe Kosovës në Berlin.

Deputeti gjerman Michael Brand nga CDU theksoi se është e gabuar të thuhet që lufta e parë në Evropë pas Luftës së Dytë Botërore ishte ajo në Ukrainë.

“Serbia, e mbështetur nga Rusia, kishte nisur luftëra që në vitin 1991 kundër Sllovenisë, Kroacisë, Bosnjës dhe më pas Kosovës. Evropa nuk kishte qëndrim të qartë për këto luftëra. Kishte vetëm fjalë, në vend që të veprohej,” tha ai.

Brand përmendi edhe një deklaratë të hershme të presidentit serb Aleksandar Vuçiq:

“Nëse ju e vrisni një serb, atëherë ne vrasim 100 myslimanë,” duke e cilësuar si simbol të vazhdimësisë së dhunës, propagandës dhe lidhjeve të tij me presidentin rus Vladimir Putin.

Deputetët kritikuan ashpër qëndrimin e dobët të Evropës ndaj aleancës serbo-ruso-kineze, ndërsa një fjalim prekës mbajti deputetja Jasmina Hostert, e lindur në Sarajevë, e cila humbi dorën gjatë luftës në Bosnje.

Tensionet në sallë u rritën kur një deputet i ekstremit të djathtë tentoi të relativizojë gjenocidin në Srebrenicë, duke nxitur reagime të ashpra nga pjesa tjetër e deputetëve.

Kujtojmë se më 23 maj 2024, Asambleja e Përgjithshme e OKB-së shpalli 11 korrikun si Ditën Ndërkombëtare të Reflektimit dhe Përkujtimit të viktimave të gjenocidit në Srebrenicë, me nismë të Gjermanisë dhe mbështetje të gjerë ndërkombëtare.