Një ngjarje tronditëse ka ndodhur në Fushë Kosovë, ku një vajzë 19 vjeçare ka përjetuar tmerrin nga duart e një të riu, i cili përveç dhunës fizike dhe psikologjike, dyshohet se ka kryer marrëdhënie seksuale me të pa pëlqimin e saj.

Burimet e Gazetës Sinjali bëjnë të ditur se viktima A.F. rreth 19-vjeçare ka raportuar se më datën 19 gusht 2025, rreth orës 21:00-22:00, është takuar me ish-të dashurin e saj L. H. rreth 31-vjeçar në rrugën “Aziz Zhilivoda” në Fushë Kosovë. Ajo ka deklaruar se i dyshuari, nën kërcënimin e një thike, e ka detyruar të shkojë me të deri në një motel në fshatin Uglar të Graçanicës, ku ka nisur makthi i saj.

Sipas dëshmisë së saj, gjatë qëndrimit atje, i dyshuari e ka mbajtur me forcë dhe ka ushtruar dhunë brutale duke e goditur me grushta, me shkop druri dhe me thikë. Vajza ka marrë plagë të shumta në këmbë, shpinë, gjoks, duar dhe fytyrë. Më pas, ai kishte kryer marrëdhënie seksuale pa dëshirën e saj.

Viktima, në gjendje të rëndë, është dërguar në QKUK – Prishtinë, ku po trajtohet për lëndimet e rënda trupore dhe traumat që ka pësuar.

Të gjitha provat janë deponuar, ndërsa Njësia për Hetimin e Krimeve të Rënda – Prishtinë është duke e trajtuar rastin.

Ky rast ka tronditur familjen, për shkak të brutalitetit dhe rrezikshmërisë së lartë që ka shfaqur i dyshuari.