Dalin pamjet nga aksidenti tragjik në aksin rrugor Sarandë–Delvinë, ku humbën jetën dy motrat Dhimaku. Siç shihet edhe në fotografitë e rënda nga vendngjarja, përplasja ka qenë tepër e fuqishme, duke shkaktuar shkatërrimin pothuajse total të dy automjeteve të përfshira.

Ngjarja e rëndë ndodhi mbrëmjen e sotme, rreth orës 20:15, pranë vendit të quajtur “Pularia”. Një automjet tip Audi, i drejtuar nga 23-vjeçari Kevin Nora, është përplasur ‘kokë më kokë’ me mjetin Lancia, që drejtohej nga Elvisa Dhimaku, 22-vjeçe.

Si pasojë e përplasjes fatale humbi jetën Elvisa, si dhe motra e saj 20-vjeçare Rozina Dhimaku, e cila ishte studente e mjekësisë.

Ndërkohë e plagosur nga aksidenti mbeti edhe 24-vjeçarja Antonela Zhupa, e cila ishte pasagjere në automjetin e motrave. Ajo ndodhet nën kujdesin e mjekëve, jashtë rrezikut për jetën.

Policia dhe prokuroria kanë nisur hetimet për zbardhjen e plotë të shkaqeve dhe rrethanave të aksidentit.