Të shtëna me armë janë raportuar në drejtim të efektivëve të policisë mbrëmjen e kësaj të enjteje në afërsi të Rinasit.

Policia e Tiranës mori informacion se një person qarkullonte i armatosur në atë zonë dhe organizoi operacion për kapjen e tij.

Në momentin që efektivët i janë afruar, i riu i identifikuar si Klajdi Buza ka qëlluar me armë zjarri në drejtim të policisë, teksa ndodhej brenda biznesit të tij, raporton Top Channel.

Fatmirësisht nga të shtënat nuk pati efektivë të lënduar, ndërsa pas kësaj u bë e mundur kapja e 34-vjeçarit.

Ky i fundit rezulton me precedent të mëparshëm penal. Ai është arrestuar edhe tre vite më parë pasi lëvizte i armatosur në Krujë.

Në vitin 2015 ai ka denoncuar vjedhjen e automjetit të tij tip ‘‘BMW X 5’, që u gjet i braktisur në vendin e quajtur ura e Gjoles në Fushë Krujë.

Njoftimi i Policisë:

Shërbimet e Forcës Operacionale të DVP Tiranë pasi kanë marrë informacion për një shtetas i cili mbante armë zjarri në subjektin e tij kanë organizuar punën me qëllim kapjen dhe vënien përpara përgjegjësisë ligjore.

Gjatë ndalimit të shërbimeve të Policisë në subjektin e tij privat në Rinas, shtetasi i identifikuar me inicialet K. B, ka qëlluar në drejtim të Policisë nga brenda subjektit të tij. Nga të shtënat nuk ka patur të lënduar. Shërbimet e Policisë kanë bërë të mundur neutralizimin e tij dhe shoqërimin për në ambientet e DVP Tiranë.

Në përfundim të veprimeve specialistët për Hetimin e Krimeve të Rënda kanë bërë arrestimin e shtetasit K. B., 34 vjeç, banues në Tiranë.

Në cilësinë e provës materiale u sekuestrua arma e zjarrit dhe municion luftarak. Materialet i kaluan Prokurorisë, për veprime të mëtejshme procedurale.