Një aksion i Njësisë për Ndërhyrje të Shpejtë (NJNSH) të Policisë së Kosovës ka çuar në ndalimin e një tentative për kontrabandë me migrantë të paligjshëm në veri të vendit.

Ngjarja ka ndodhur më 24 gusht 2025, në një pikë kontrolli afër pikëkalimit kufitar Kosovë–Serbi (Jarinjë), ku është ndaluar një autobus me targa (NP), i cili operonte në linjën Mitrovicë–Beograd. Gjatë kontrollit, në katin e parë të mjetit u gjetën 8 udhëtarë të regjistruar në listën zyrtare, ndërsa në katin e dytë u zbuluan 18 shtetas të huaj, të paregjistruar dhe pa të drejtë hyrjeje në territorin e Kosovës, raporton PodujevaSot.net.

Sipas të dhënave të para të hetimit, bëhet fjalë për një tentim të organizuar kontrabande me migrantë. Pronari i kompanisë, G. A., dhe shoferi B. D., janë arrestuar si të dyshuar për përfshirje direkte në këtë veprimtari të paligjshme.

Nga verifikimi i dokumenteve, rezultoi se pesë shtetas palestinez kishin hyrë në Kosovë përmes Aeroportit të Prishtinës, gjashtë shtetas nga Bangladeshi kishin viza pune por ishin subjekt i largimit nga vendi, ndërsa shtatë shtetas egjiptian kishin hyrë nga Shqipëria me destinacion përfundimtar vendet e BE-së, raporton PodujevaSot.net.

Të gjithë të dyshuarit janë intervistuar në prani të avokatëve dhe janë dërguar në mbajtje, ndërsa migrantët e gjetur janë trajtuar sipas procedurave ligjore nga Drejtoria për Migrim dhe të Huaj. Policia e Kosovës ka theksuar se do të vazhdojë aksionet kundër kontrabandës me njerëz dhe çdo aktiviteti që cenon sigurinë e vendit.