Një ngjarje tragjike ka tronditur komunitetin shqiptar në Paksos, ku një vajzë vetëm 4-vjeçare ka humbur jetën duke u mbytur në pishinën e një vile, vetëm 300 metra larg shtëpisë së saj, raporton PodujevaSot.net.

Ngjarja ka ndodhur pasditen e së premtes, më 22 gusht, rreth orës 16:00. E vogla, e identifikuar si Amelia, kishte dalë nga shtëpia ndërkohë që po luante në oborr.

Nëna e saj ishte në banjë duke u përgatitur për punë, ndërsa babai dhe gjyshi nuk e kishin vënë re largimin e saj.

Pas disa orësh kërkimi, trupin e pajetë të vajzës e gjeti një kuzhinier i një vile aty pranë, i cili njoftoi menjëherë policinë dhe shërbimet emergjente, raporton PodujevaSot.net.

Pavarësisht përpjekjeve të mjekëve dhe aplikimit të masave të reanimimit (CPR), e vogla nuk arriti të shpëtojë.

Nëna e saj, e shokuar nga ngjarja, njoftoi punëdhënësin se nuk do të mund të shkonte në punë pasi vajza i ishte zhdukur. Vetëm më vonë ajo u informua për lajmin tragjik.

Autoritetet greke kanë arrestuar gjyshin dhe prindërit e vajzës, të cilët do të përballen me akuzën për ekspozim të fëmijës ndaj rrezikut.

Ata do të paraqiten para prokurorit në Korfuz më 25 gusht për të dhënë shpjegimet e tyre, raporton PodujevaSot.net.