Rastet e dhunës në vendin tonë vazhdojnë të jenë shqetësim serioz për sigurinë publike, sidomos kur ndodhin në mes të ditës dhe në vende të frekuentuara nga qytetarët. Një tjetër rast i rëndë është shënuar sot në qytetin e Pejës, ku një i ri ka përfunduar në spital pas një sulmi brutal që dyshohet se u krye me armë zjarri.

Sinjali mëson se incidenti ka ndodhur rreth orës 10:20 në rrugën “Uesli Klark”, përballë marketit “Minimax”, ku K.K., rreth 22-vjeçar është sulmuar në mënyrë të papritur nga një person i njohur për të – P.B., rreth 20-vjeçar.

Burimet e Sinjalit brenda hetuesisë bëjnë me dije se i dyshuari iu afrua viktimës teksa ai qëndronte në trotuar dhe e goditi në pjesën e ballit me pjesën e poshtme të një revoleje. Menjëherë pas aktit, i dyshuari është larguar nga vendi i ngjarjes dhe aktualisht ndodhet në arrati.

Në vendin e ngjarjes kanë dalë njësitet patrulluese, emergjenca, hetuesit dhe krimteknikët. Viktima është dërguar në Spitalin e Pejës për trajtim mjekësor, ku pas ndihmës është liruar, por për shkak të gjendjes së tij shëndetësore nuk është intervistuar ende, thonë burimet e Sinjalit.

Për momentin motivi i sulmit mbetet i panjohur, ndërsa policia është në kërkim të të dyshuarit.