Konflikt mes dy të rinjve, i dyshuari ia thyen dy dhëmbë 25-vjeçarit

Mosmarrëveshjet mes qytetarëve shpesh herë përcillen me ofendime e kërcënime ndaj njëri-tjetrit. Madje nuk janë të rralla rastet kur ato shpërthejnë në dhunë, duke u përleshur fizikisht mes vete, raporton Gazeta Sinjali.

Një rast i tillë ka ndodhur mbrëmë në rrugën ‘Galip Badiviku’ në Vushtrri, ku pas një konflikti verbal, një i ri dyshohet se ka sulmuar fizikisht një person.

Burimet e Gazetës Sinjali brenda Emergjencës kanë bërë me dije se 25-vjeçari është dërguar atje në gjendje të rëndë, pasi si pasojë e goditjeve që dyshohet se ia shkaktoi një 18-vjeçari, atij i janë thyer dy dhëmbë.

Ndërkohë lidhur me rastin është njoftuar edhe Policia e Kosovës, të cilët kanë dalë në vendin e ngjarjes ku kanë intervistuar viktimën. Bazuar në dëshminë e tij gjithçka ka ndodhur para një kafeneje në Vushtrri, ku pas zënkës që kishte me të dyshuarin, ky i fundit i ka hedhur sprej fytyrës dhe më pas e ka goditur me grushte.

Me urdhëresë të Gjykatës dhe në koordinim me Prokurorinë, Policia ka kryer bastisje në shtëpinë e të dyshuarit, ku kanë gjetur dhe sekuestruar sprejin që dyshohet se u përdor në rast dhe kanë arrestuar 18-vjeçarin.

Pas intervistimit nga hetuesit policorë dhe përfundimit të procedurave tjera, Prokurori i Shtetit ka urdhëruar që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Lëndim i rëndë trupor’.