Babai e dërgon në Polici djalin e tij, thotë se e vodhi një veturë
Të dyshuarit për kryerjen e veprave të ndryshme penale, në shumë raste kapen pas veprimeve hetimore të Policisë.
Shpesh herë kjo arrihet edhe përmes bashkëpunimit të qytetarëve me organet e hetuesisë, duke dhënë informacione lidhur me raste për të cilat kanë informacione, raporton Gazeta Sinjali.
Me Policinë ka bashkëpunuar dje edhe një person në Fushë Kosovë, i cili ka denoncuar djalin e tij për një vjedhje të rëndë.
Burimet e Gazetës Sinjali kanë bërë me dije se 44-vjeçari ka telefonuar Policinë duke i njoftuar se djali i tij i mitur ka vjedhur një veturë, teksa ka dhënë të dhënat për lokacionin se ku ndodhet automjeti dhe djali i tij.
Njësitë policore kanë dalë në vendin e ngjarjes, të cilët kanë arrestuar të dyshuarin dhe kanë sekuestruar veturën e vjedhur.
Pas përfundimit të procedurave policore, Prokurori ka urdhëruar që i dyshuari të dërgohet në mbajtje dhe të hetohet nën dyshimet për kryerjen e veprës penale ‘Vjedhje e rëndë’.
