Lëndohet në vendin e punës një 19 vjeçar

Rastet e lëndimeve të punëtorëve në vendet e tyre të punës janë të shpeshta në vendin tonë.

Ato mund të jetën aksidentale, por në shumë raste shkaktohen edhe si pasojë e kushteve jo të mira në punë.

Për fatin e keq, një numër i madh i tyre ndër vite kanë përfunduar edhe tragjikisht, raporton Gazeta Sinjali.

Me urgjencë është dërguar në spital sot edhe një punëtor i një fabrike në fshatin Shirokë të Suharekës.

Burimet e Gazetës Sinjali brenda Emergjencës së Qendrës Kryesore të Mjekësisë Familjare në Suharekë kanë bërë me dije se i riu është dërguar atje me lëndime të dukshme në dorë, të cilat dyshohet se i ishin shkaktuar nga një mjet i mprehtë.

Pas dhënies së ndihmës së parë mjekësore, është transferuar me urgjencë në Spitalin Rajonal në Prizren. Pas intervenimit të stafit mjekësor, gjendja shëndetësore e 19-vjeçarit është stabilizuar dhe ai ndodhet jashtë rrezikut për jetë.

Lidhur me rastin është njoftuar edhe Policia e Kosovës të cilët kanë dalë në vendin e ngjarjes dhe kanë kryer ekzaminimet e nevojshme që ndihmojnë në zbardhjen e rrethanave të rastit.

Me urdhër të prokurorit, rasti është cilësuar “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.