I moshuari godet me shufër metalike një person
Mosmarrëveshjet e momentit mes qytetarëve shpesh herë përcillen me ofendime e kërcënime ndaj njëri-tjetrit. Madje nuk janë të rralla rastet kur ato shpërthejnë në dhunë, duke u përleshur fizikisht mes vete, raporton Gazeta Sinjali.
Një ngatërresë mes dy personave ka ndodhur mëngjesin e sotëm në rrugën ‘Ilaz Kodra’ në Skenderaj, ku një 65-vjeçar dyshohet se ka sulmuar fizikisht një person.
Burimet e Gazetës Sinjali brenda Emergjencës kanë bërë me dije se viktima është dërguar atje me lëndime të dukshme trupore, të cilat dyshohet se i janë shkaktuar me anë të goditjeve nga një mjet i fortë.
Pas dhënies së ndihmës së parë, 51-vjeçari është transferuar në Spitalin Rajonal në Mitrovicë ku ka marrë trajtimin e mëtutjeshëm mjekësor.
Ndërkohë lidhur me rastin është njoftuar edhe Policia e Kosovës, të cilët më pas kanë intervistuar viktimën, sipas të cilit gjithçka ka ndodhur pas një konflikti verbal të momentit.
Bazuar në dëshminë e tij, i dyshuari e ka goditur me një shufër metalike dhe më pas është larguar nga vendi i ngjarjes.
Si rezultat i denoncimit, njësitë policore kanë nisur kërkimet për të dyshuarin, i cili është gjetur dhe arrestuar në një lagje të Skenderajt.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti të hetohet nën dyshimet për kryerjen e veprës penale ‘Lëndim i lehtë trupor’.
