Shpëton mrekullisht një person që ishte rrokullisur me traktor

Policia e Kosovës ka bërë të ditur se një aksident ka ndodhur dje në fshatin Bellobërdë të Leposaviqit, ku një person është rrokullisur me traktorin e tij, duke mbetur nën traktor dhe i është vënë jeta në rrezik.

Policia e Kosovës ka njoftuar se të martën rreth orës 18:20, derisa ishte duke patrulluar në fshatin Bellobërdë të komunës së Leposaviqit, ka hasur në një vet-aksident, ku një qytetar ishte rrokullisur me traktorin e tij.

Sipas njoftimit nga policia, ai kishte mbetur nën traktor dhe jeta e tij ishte seriozisht e rrezikuar.

Zyrtarët policorë menjëherë kanë intervenuar dhe me ndihmën e disa qytetarëve kanë arritur që ta largojnë traktorin dhe ta nxjerrin personin që kishte pësuar aksident.

“Policia e Kosovës apelon tek të gjithë pjesëmarrësit në komunikacion të kenë kujdes të shtuar, veçanërisht në këto kushte atmosferike”, thuhet në njoftimin për media.

Personi ka marrë tretman mjekësor dhe gjendja shëndetësore e tij është e mirë.