Kërcet grushti në shkollë: 5 nxënës rrahen mes vete

Rrahjet e përleshjet mes nxënësve në shkollat fillore e të mesme janë shumë të shpeshta.

Drejtoritë shpesh detyrohen të kërkojnë ndihmën e Policisë për të intervenuar në incidente të tilla që ndodhin brenda hapësirave të shkollave.

Një rast i tillë dyshohet se ka ndodhur sot në Gjakovë, ku disa nxënës të një shkolle të mesme janë përfshirë në përleshje, raporton Gazeta Sinjali.

Ngjarja dyshohet të ketë ndodhur në shkollën e mesme teknike “Nexhmedin Nixha” në Gjakovë, ku pas një mosmarrëveshje pesë nxënës janë rrahur mes vete dhe për pasojë kanë pësuar lëndime trupore dhe kanë kërkuar ndihmë mjekësore në spital.

Burimet nga Prokuroria kanë bërë me dije se rasti u denoncua nga drejtoria në Polici, me ç’rast pesë të dyshuarit janë shoqëruar në stacion policor për intervistim, ku kanë dhënë deklaratat e tyre për motivin e rrahjes.

Sinjali mëson se rrahja dyshohet se ndodhi për shkak të një konflikti të mëhershëm që nxënësit kanë pasur mes vete dhe vendosën që t’i qërojnë hesapet sot brenda hapësirave të shkollës.

Pas përfundimit të procedurave policore, me urdhër të Prokurorit të Shtetit, ndaj të dyshuarve është iniciuar rasti ‘Lëndim i lehtë trupor”.

Kujtojmë se rastet e tilla janë kthyer në shqetësim edhe për prindërit, për shkak të sigurisë në institucionet arsimore.