E rëndë: 13 vjeçarja tenton t’i jap fund jetës pas qortimeve nga nëna dhe kujdestarja

Një ngjarje e rëndë ka ndodhur sot në Prizren, ku një vajzë e mitur dyshohet se ka tentuar t’i japë fund jetës së saj, raporton Gazeta Sinjali.

Burimet e Gazetës Sinjali brenda Emergjencës së Spitalit Rajonal në Prizren kanë bërë me dije se 13-vjeçarja është dërguar atje në gjendje të rëndë, pasi dyshohet se ka konsumuar disa tableta dhe preparate higjienike [domestos].

Pas intervenimit të stafit mjekësor, gjendja e saj shëndetësore është stabilizuar dhe ajo ndodhet jashtë rrezikut për jetë.

Në kuadër të veprimeve hetimore, viktima është intervistuar në prezencën e babait të saj, ku sipas burimeve të Sinjalit, ajo ka deklaruar se këtë vepër e ka bërë për shkak të qortimeve që ka marrë nga kujdestarja e klasës dhe nëna e saj për disa veprime të cilat i ka kryer.

Me urdhër të prokurorit, rasti është cilësuar ‘Vetëvrasje në tentativë’.