Xavi konfirmon interesimin e Barcelonës për Joshua Kimmichun

Trajneri i Barcelonës Xavi Hernandez ka konfirmuar se kanë interesim për të nënshkruar me mesfushorin e Bayern Munichut, Joshua Kimmich.

Katalunasit janë duke kërkuar një pasues të Sergio Busquets, i cili ka vendosur të largohet nga “Camp Nou” sapo kontrata t’i skadojë në fundin e muajit.

Xavi ka konfirmuar se Barcelona ka interesim për 28-vjeçarin dhe do ta nisin negociatat me kampionin e Gjermanisë nëse është “dera e hapur”.

“Ai është top lojtar, i cili e kupton lojën në mënyrë fantastike. Nëse do të jetë dera e hapur, atëherë do të ketë negociata me Bayernin“.

“Çfarë është e qartë është se kemi nevojë për një futbollist të nivelit shumë të lartë në atë pozitë, përndryshe do të jetë shumë e vështirë për të garuar vitin tjetër“.

“Klubi tashmë e di se nëse duhet të telefonoj ose udhëtoj atëherë e bëj sepse jam katalunas dhe trajner i Barcelonës“, deklaroi tekniku spanjoll për Mundo Deportivo.

Sipas raportimeve të fundit, gjermani po e konsideron të ardhmen në “Allianz Arena” pasi thuhet se nuk është i lumtur me shkarkimin e Julian Nagelsmann.

Gjermani gjithashtu është i zemëruar me atmosferën jo të mirë brenda zhveshtores, që mund të ndikojë të kërkojë largimin nga Bayern Munichu gjatë verës.

Kimmich ka pasur rol kyç te Bayerni në edicionin 2022/23 duke bërë 47 paraqitje në të gjitha garat, duke shënuar shtatë gola dhe dhuruar 11 asistime.

Që prej kalimit te Bayern në korrikun e vitit 2015 ai ka zhvilluar 347 paraqitje, duke kontribuar me 40 gola dhe 94 asistime.