Zyrtare: Mentor Zhdrella drejtor sportiv te Llapi
Ish-mesfushori Mentor Zhdrella është emëruar Drejtor Sportiv i klubit të Llapit.
“Bordi drejtues i klubit ka vendosur për Zhdrellën në pozitën e Drejtorit Sportiv pasi që kontributi i tij për Llapin në të kaluarën si futbollist ka qenë i jashtëzakonshëm”, thuhet në njoftimin e klubit të Llapit.
34-vjeçari është prezantuar sot në prani të kryetrajnerit Tahir Batatina i cili i ka uruar mirëseardhje Zhdrellës, transmeton Klankosova.tv.
Edhe vetë Zhdrella është shprehur i kënaqur me emërimin e tij në pozitën e Drejtorit Sportiv.
“Falenderoj bordin drejtues të klubit, Presidentin e klubit z. Beqir Batatina për besimin. Jam jashtëzakonisht i lumtur për emërimin tim në këtë pozitë kaq të rëndësishme. Kemi shumë punë për të bërë dhe me organizimin që ka bërë klubi besoj do ia dalim t’i arrijmë objektivat tona”, deklaroi Zhdrella për faqen zyrtare të Llapit.
