Kur do të përfundojë rruga Podujevë – Prishtinë, këto janë detajet

Rruga për Podujevë që ka nisur të ndërtohet para shtatë vjetësh, pritet të përfundojë brenda 425 ditëve. Punimet kanë nisur sot, aty ishin edhe kryeministri Kurti dhe ministri Aliu.

Kryeministri Albin Kurti ka inspektuar fillimin e punimeve të rrugës Prishtinë-Podujevë.

Aty ishte edhe Liburn Aliu, ministri i Infrastrukturës, dikaster ky që e ka dhënë tenderin për ndërtimin e rrugës nacionale Prishtinë-Besi-Podujevë, vlera e të cilit peshon 37 milionë euro, shkruan Gazeta Sinjali.

Kontrata milionëshe ka pesë llote, tri prej të cilave janë nëshkruar dhe kapin vlerën e 24 milionë eurove.

Sipas dokumenteve të publikuar e-prokurim, lotin e parë e ka fituar kompania “Pro & Co Group SH.P.K.” dhe “Levantina Ingenieria Y Construccion”, shuma e të cilit është 6.4 milionë euro.

Llotin e dytë për ndërtimin e kësaj rruge e kanë fituar kompanitë “2A Group SH.P.K. Vega sh.p.k, dhe peshon 8 milionë e 447 mijë euro.

Ndërkaq, llotin e tretë me vlerë prej 9 milionë e 200 mijë eurove e ka fituar grup i operatorëve ekonomik “Agbes Construksion shpk; Arbotec SH.P.K.; GEO CONSTRUCTION sh.p.k; MINERAL L.L.C.; BM Group SH.P.K, shkruan Gazeta Sinjali.

Rruga Prishtinë-Podujevë kishte filluar të ndërtohet para shtatë vjetësh, dhe ende nuk ka përfunduar, ndonëse kur erdhi Qeveria e Albin Kurti kishte premtuar se rrugën problematike do ta përfundonte brenda një viti të qeverisjes.

Ndërsa, tash parashihet të kryhet brenda 425 ditë të punës, shkruan Gazeta Sinjali.

Çfarë thanë Kurti e Aliu sot në përurim?

Kurti tha se kjo rrugë është 15 kilometar, dhe do të kushtojë rreth 35 milionë euro. Sipas tij, ngecja për ndërtimin e kësaj rruge ka qenë për shkak se punimet kanë filluar në ekzekutim pa planifikim e pa përgatitje.

“Sot vizituam disa pika përgjatë rrugës e cila po zgjerohet me gjatësi të gjithmbarshme rreth 15 km në llotet e ndryshme. Inspektuam punimet, pamë harta dhe gjithashtu bashkëbiseduam me punëtorët dhe me ngasësit e makinerisë për punën që janë duke e kryer dhe e cila kap vlerën e gjithmbarshme për rreth 35 milionë euro”, tha ai në nisjen e punimeve.

“Rruga Prishtinë-Podujevë është e vjetër gjysmë shekulli dhe ka qenë nevojë e kamotshme e trevës së Llapit që të lidhet me kryeqytetin në mënyrë efikase të shpejtë dhe të sigurt dhe do të bëjmë çmos që kjo rrugë të përfundoj sa më parë. Natyrisht që numri i ditëve është rreth numrit të ditëve që ka viti që nevojiten si ditë punë që të përfundoj kjo”.

“Por, tash jemi në rrugë të mbarë për të përfunduar këtë zgjerim i cili është i rëndësishme pra jo vetëm për shpejtësinë e lidhjes më kryeqytet, por edhe për sigurinë e të gjithë qytetarëve. Ngecja e madhe ka ekzistuar pikërisht për shkak se kanë hyrë në ekzekutim pa planifikim e pa përgatitje. Tash ne e rikuperuam me shpejtësi maksimale dhe do të bëhet zgjerimi i rrugës. Do të vazhdojmë edhe më një vizitë tjetër që do të ja bëjmë edhe rregullimit rrugës Prishtinë-Mitrovicë”, tha tutje Kurti.

Kurse ministri Liburn Aliu, ka thënë se zgjerimi i rrugës do të ketë ndikime të shumta në trafikun ekzistues që është një ndër problemet kryesore

“Projekti i zgjerimit të rrugës Prishtinë Podujevë është projekt që i ka pesë llote. Jemi në një mënyrë, në një sistem më të organizuar të zhvillimit dhe punimit. Përvojat nga e kaluara na kanë treguar që është shumë e rëndësishme që proceset e shpronësimit të kryhen para se të fillojnë punët, për shkak se një ndër element e zvarritjeve në projekte janë elemente e shpronësimit. Një element i rëndësishëm është trafiku në këtë rrugë. Zgjerimi i rrugës do të ketë ndikime të shumta në trafikun ekzistues që është një ndër problemet kryesore”.

“Jemi duke u marr, kemi krijuar ekipe të veçanta që të merren me mbarëvajtjen e trafikut sidomos gjatë këtyre muajve të parë që do të hyjë diaspora, respektimit mërgata jonë do të ketë prezentë dhe do të jetë trafiku më i shtuar. Do të kemi kujdes që të mos ketë pengim të trafikut më rrugë. Pastaj do të fillojmë të punojmë edhe më trup të rrugës. Jemi mjaftë të përkushtuar dhe të vendosur që kjo rrugë të kryhet në kohë që të kemi cilësi të punimeve, e paralelisht më këtë edhe për projektet e tjera”, tha ai.