Shpallet i pafajshëm Bedri Krasniqi

Bedri Krasniqi i akuzuar për vrasjen e rëndë të një polici të Kosovës dhe një të UNMIK – ut është shpallur i pafajshëm dhe është liruar nga akuza në mungesë të provave.

Kryetari i trupit gjykues Arben Hoti, pas shpalljes së aktgjykimit, ka arsyetuar vendimin ku ka thënë se nuk ka pasur prova te mjaftueshme dhe nuk është provuar se i njëjti ka kryer veprën penale.

Trupi gjykues ka vendosur që Bedri Krasniqin, i akuzuari për vrasjen e dy zyrtarëve policorë lirohet nga akuza ne pikën një dhe dy.

Aktakuza lidhur me rastin e vrasjes që aktualisht po gjykohet, ishte ngritur më 21 korrik të vitit 2017, me të cilën të akuzuarit i ngarkonte me veprën penale vrasja e rëndë dhe vrasja në tentativë.

Në atë kohë, të njëjtat akuza binin në barrën e katër të akuzuarve, Bedri Krasniqi, Alban Dezdari, Bajram Kiqmari, Faik Shaqiri, mirëpo Gjykata Supreme, përmes një aktvendimi të nëntorit të po atij viti, Kiqmarin dhe Shaqirin i kishte liruar, pasi të dy të akuzuarit ishin gjykuar vite më parë dhe se ka një aktgjykim për pushimin e hetimeve kundër tyre.

Zyrtari i Policisë së Kosovës, Basri Mulliqi, dhe përkthyesi i UNMIK-ut, Ramë Zeneli, kishin pësuar lëndime si rezultat i plumbave të shkrepur.

Sipas aktakuzës së EULEX-it, të akuzuarit me qëllim kishin rrezikuar jetën edhe të personave të tjerë të cilët ishin në automjete që vinin pas veturës së UNMIK-ut, si dhe këto dy vrasje.

Gjatë këtij gjykimi, vëmendje të shquar ka marrë dëshmia e dëshmitarit Shkumbin Mehmeti, i cili aktualisht është në vuajtje të dënimit prej 30 vjetësh.