Detaje nga aksidenti me fatalitet – 44 vjeçari humbi jetën
Një 44-vjeçar ka vdekur e katër persona të tjerë janë lënduar si pasojë e një aksidenti që ka ndodhur në autostradën “Arbën Xhaferi” Lipjan – Ferizaj.
Të përfshira në këtë aksident kanë qenë dy automjeteve transportuese, njëri prej të cilëve ka qenë në lëvizje ndërsa tjetri i ndalur në shiritin emergjent.
Vdekja e viktimës është konstatuar nga mjeku kujdestar, ndërsa katër personat e lënduar janë transportuar në Qendrën Klinike Universitare të Kosovës për trajtim mjekësor.
Lajmi për KALLXO.com është konfirmuar nga zëdhënësi i Policisë së Kosovës, Daut Hoxha.
Hoxha ka thënë se ekipet relevante policore kanë dalë në vendin e aksidentit dhe po punojnë në identifikimin e shkaqeve të aksidentit dhe rrethanave që e karakterizojnë.
Ai tha se lidhur me rastin është njoftuar edhe prokurori.
Ai tha se Policia kërkon nga të gjithë drejtuesit e automjeteve të jenë më vigjilentë dhe të respektojnë rregullat në trafikun rrugor.
“Respektimi i shenjave në trafik dhe përshtatja e shpejtësisë me kushtet në rrugë është domosdoshmëri për një siguri më të madhe rrugore” – shtoi zëdhënësi Hoxha.
Hoxha theksoi se Policia e Kosovës po ndërmerr dhe do të ndërmarrë në vazhdimësi masa rigoroze ligjore ndaj të gjithë atyre që bien ndesh me rregullat dhe ligjet e trafikut dhe në një mënyrë apo tjetër rrezikojnë sigurinë e pjesëmarrësve në rrugë
