Përurohet shkolla dhe salla sportive në Batllavë

Sot është bërë përurimi i shkollës amë “Luigj Gurakuqi” në Batllavë si dhe është përuruar palestra sportive në këtë fshat. Ndërsa në fshatin Llugë u vendosë gurthemeli i ndërtimit të shkollës “Ilir Konushefci”.

Në përurimin dhe gurthemelin e tyre kanë marrë pjesë kryetari i Komunës, Shpejtim Bulliqi, kryeministri i Kosovës, Albin Kurti dhe Ministrja e Arsimit, Shkencës, Teknologjisë dhe Inovacionit Arbërie Nagavci, drejtorë komunal, staf të shkollave dhe qytetarë.

Në përurimin e shkollës së re në Batllavë u mbajt edhe një program festiv i përgatitur nga stafi i shkollës dhe Komuna e Podujevës. Në programin e përgatitur mbajtën fjalë rasti, kryetari Bulliqi, kryeministri Kurti dhe ministrja Nagavci.

Kryetari Bulliqi tha “Po punojmë që përveç infrastrukturës shkollore t’i furnizojmë shkollat tona edhe me mjete të konkretizimit, kabinete shkollore e salla sportive, me qëllim të ngritjes së cilësisë në arsim dhe shkollat tona t’i bëjmë konkurruese me shkollat e vendeve më të zhvilluara”.

Kryeministri Kurti foli për investimet nga ana e Qeverisë në fushën e arsimit dhe shprehu gëzimin për finalizimin e këtij projekti për nxënësit e shkollës në Batllavë, duke u zotuar që si nivel qendror do të vazhdojnë me projekte të tjera investive në shkollat e Komunës së Podujevës dhe komunave tjera. Ndërsa kryetari Bulliqi e përmbylli fjalën e tij duke i uruar nxënësit, mësimdhënësit, prindërit dhe banorët për realizimin e projekteve.