Voziste i dehur, pas ndalimit qytetari tentoi të korruptojë policin
Një 46-vjeçar është kapur në flagrancë nga Policia Rrugore e Durrësit teksa drejtonte automjetin në gjendje të dehur.
Incidenti ndodhi të dielën, gjatë kontrolleve parandaluese në rrugën “Martin Camaj”.
Sipas autoriteteve, shtetasi A. O., 46 vjeç, u ndalua nga policia pasi iu mat një nivel alkooli prej 1.26 mg/l.
Gjatë ndalimit, ai tentoi të korruptonte punonjësit e policisë duke u ofruar 4500 lekë të rinj për të shmangur arrestimin.
Në vijim të veprimeve procedurale, 46-vjeçari u arrestua për veprat penale “Korrupsioni aktiv i personave që ushtrojnë funksione publike” dhe “Drejtimi i automjeteve në mënyrë të parregullt”.
Policia Rrugore e Durrësit apelon për zbatimin rigoroz të rregullave të qarkullimit rrugor dhe nxit qytetarët të denoncojnë çdo shkelje në numrin 112, duke garantuar anonimat të plotë dhe reagim të shpejtë.
