Ramabaja për herë të parë nuk pajtohet me VV-në: “Ministrat duhet të jenë aktivë në media”
Analisti Sadri Ramabaja ka komentuar qëndrimin e Lëvizjes Vetëvendosje për “bojkotimin e disa emisioneve të mbrëmjes”, duke theksuar rëndësinë e pranisë së politikanëve në media.
“Unë pajtohem që deputetët, ministrat dhe zëvendësministrat duhet të jenë aktivë dhe prezentë në media, sepse mediat kanë marrë një rol të jashtëzakonshëm politik dhe të mesazhit politik”, ka theksuar Ramabaja në Debat Plus, i cili njihet si përkrahës i VV-së.
Ai ka theksuar se roli i deputetëve ka ndryshuar krahasuar me dy dekada më parë dhe se sot debatet televizive përcillen më shumë se kurrë në mbarë botën.
“Nuk pajtohem me këtë qëndrim të Vetëvendosjes. Nuk besoj që i bojkotojnë të gjitha emisionet e mbrëmjes, por kanë përmendur disa prej tyre me emra”, ka shtuar ai.
