Podujevë: Nënshkruhet projekt i rëndësishëm në vlerë 35 milionë

Postimi i Bulliqit:

Në vlerë prej 35 milionë euro nënshkruam marrëveshjen për ndërtimin e impiantit të ujërave të zeza në Podujevë

Sot është një ditë shumë e rëndësishme për komunën tonë, pasi kemi nënshkruar marrëveshjen për ndërtimin e impiantit të trajtimit të ujërave të zeza në Podujevë, një investim i madh prej 35 milionë euro, nga te cilat 25 milionë euro janë kredi nga BERZH-i (kthimin e mjeteve e bën Qeveria e Kosovës) dhe 10 milionë euro do të sigurohen nga Korniza Investive e Bashkimit Evropian për Ballkanin Përendimor.

Ky projekt, që realizohet në bashkëpunim me Qeverinë e Kosovës, Bankën Evropiane për Rindërtim dhe Zhvillim (BERZH) dhe Kompaninë Rajonale të Ujësjellësit “Prishtina”.

Me ndërtimin e këtij impianti, jo vetëm që do të trajtojmë ujërat e zeza sipas standardeve bashkëkohore, por edhe do të kontribuojmë në reduktimin e ndotjes së lumenjve dhe mbrojtjen e burimeve ujore.

Në ceremoninë e nënshkrimit të marrëveshjes ishim bashkë me Ministrin e Financave, z.Hekuran Murati, Zëvendësministrin e Ekonomisë z.Getoar Mjeku, Drejtorin e BERZH-it në Kosovë z.Sergiy Maslichenko dhe Kryeshefin e KRU Prishtina z.Arsim Fetahu.