Mërgimtari përfundon në Polici pasi u denoncua për dhunë ndaj gruas

Numri i rasteve të dhunës në familjet kosovare është në rritje çdo ditë e më shumë. Jo rrallëherë ndodh që në Polici të denoncohen edhe problemet mes çifteve nga diaspora, të cilët i zë sherri posa arrijnë në Kosovë, Kështu ka ndodhur së fundmi në Gjilan, ku intervenoi Policia, raporton Gazeta Sinjali.

Këtë herë në rast janë përfshirë një çift që erdhën nga Amerika për pushime dhe gjatë qëndrimit në Kosovë, lindën disa mosmarrëveshje mes tyre.

Sinjali mëson se konfliktet verbale dyshohet se eskaluan edhe në dhunë, për çka palët kanë dhënë deklaratat e tyre në Polici – ku kanë rrëfyer krejt çka kishte ndodhur.

Bazuar në dëshminë e viktimës, burri i saj fillimisht e ka goditur e më pas ajo e ka shtyrë në vetëmbrojtje dhe gjithçka dyshohet se ka ndodhur në sy të fëmijës së tyre.

Burimet brenda Prokurorisë kanë bërë me dije se motivi i rastit dyshohet se lidhet me akuzat e gruas që burri nuk e ka lejuar që të kthehet në Amerikë bashkë me fëmijën e tyre.

Si rezultat i denoncimit, Policia ka intervenuar dhe ka ndërmarrë të gjitha veprimet e nevojshme, ndërsa çifti ka vendosur që të kthehen bashkë në shtëpinë e tyre në Gjilan.

Ndaj tw dyshuarit, Prokurori i Shtetit ka urdhëruar inicimin e rastit për veprën penale “Dhuna në familje”.