Klan Kosova ofron debat mes “kryeministrave”

Kanë mbetur vetëm edhe dy javë deri në ditën kur qytetarët e Kosovës do të mundë të vendosin për të ardhmen e tyre – pra, për ta zgjedhur kryeministrin i cili do të jetë në krye të qeverisë për katër vitet e ardhshme.

Deri në këto momente, nuk ka pasur debat politik në mes të kandidatëve për kryeministër nga katër partitë, ndonëse të hapur kanë qenë LDK-ja, PDK-ja e AAK-ja, por jo edhe partia në pushtet.

Por, dikur, një gjë të tillë e kërkonte edhe Lëvizja Vetëvendosje.

Nisur nga disa deklarata te liderëve të ndryshëm politikë, të cilët kanë kërkuar mbajtjen e debateve mes kandidatëve për kryeministër, televizioni Klan Kosovashprehet i gatshëm për organizimin e këtyre debateve në çdo kohë dhe moment që partitë politike do bien dakord.

Si platforma mediatike më e madhe dhe më e ndjekur në Republikën e Kosovës, Klani disponon të gjitha kushtet, hapësirat, teknikën e duhur dhe gazetarët profesionistë për mbarëvajtjen me cilësi të këtyre debateve.

Duke garantuar jo vetëm cilësi, por edhe paanshmëri ne iu kërkojmë partive politike dhe kandidatëve për Kryeministër të angazhohen për të ballafaquar premtimet dhe programet e tyre në dobi të qytetarëve të Kosovës, të cilët ashtu si qytetarët e vendeve të civilizuara, meritojnë të gjykojnë në mënyrë sa më transparente përpara se të hedhin votën e tyre në zgjedhjet e 9 shkurtit.

Ne jemi të gatshëm t’ua ofrojmë këtë mundësi si qytetarëve ashtu edhe liderëve politikë pa asnjë dallim.

Për këtë arsye duke nisur nga dita e hënë, stafi i gazetarëve të Klan Kosovës do t’iu drejtohet zyrtarisht partive politike për të dakorduar detajet me shpresën se të gjitha do kenë gatishmëri për t’u ballafaquar në këto debate të domosdoshme për demokracinë tonë të re.