Edhe deputetët në hall me shkollat (VIDEO)

Deputetët e Kuvendit të Kosovës, fëmijët e të cilëve vijojnë mësimet në shkollat private, nuk u prekën nga çështja e grevës. Të njëjtit që refuzuan të flasin për këtë çështje, nuk treguan pse kanë zgjedhur të mos i dërgojnë në ato publike.

Nuk ka statistika se sa politikanë kanë zgjedhur shkollat private për të vegjlit e tyre, por kjo nuk i duket në rregull deputetit, Eman Rrahmani, i cili thotë se është obligim i zyrtarëve publikë, që fëmijët ti kenë në institucione arsimore poashtu publike.

Bashkëpartiaku i Rrahmanit, Visar Korenica, që thotë se është i prekur nga greva, tregon se në kohën e seancës së parë të sesionit vjeshtorë, fëmijët e tij ishin të vetëm, meqë si ai edhe bashkëshortja ishin në punë.

Ndërkaq, për deputetin e Lidhjes Demokratike të Kosovës, Armend Zemaj, kjo cështje kishte një zgjidhje më  me fat, meqë deklaroi se për fëmijët kujdesen prindërit (gjyshërit). Për grevën në sistemin arsimor, u diskutua në seancën e së enjtes.