Nagip Krasniqi nuk e pranon fajësinë për aktakuzën e dytë: Plotësisht i pafajshëm

Ish-kryeshefi i KEK-ut, Nagip Krasniqi dhe Isuf Zejna, të akuzuar nga Prokuroria Speciale për keqpërdorim të detyrës, zbulim të fshehtësisë zyrtare dhe ndihmë në keqpërdorim të detyrës apo autoritetit zyrtar, janë deklaruar të pafajshëm, në seancën e mbajtur sot.

Krasniqi tha se është “plotësisht i pafajshëm në të gjitha pikat e aktakuzës”, ndërsa edhe i akuzuari Zejna nuk e pranoi fajësinë.

Ndërsa i akuzuari tjetër Ymer Dragusha e ka pranuar fajësinë dhe në seancë është bërë aprovimi i marrëveshjes nga Gjykata në mes tij dhe Prokurorisë Speciale.

Ata akuzohen se me veprimet e tyre i kanë shkaktuar dëm buxhetit të Kosovës në vlerë të 37 milionë eurove.

Prokuroria pati ngritur aktakuzën e parë kundër Krasniqit në gusht të këtij viti për keqpërdorim të detyrës zyrtare për periudhë më pak se dyvjeçare.

Krasniqi ishte arrestuar në prill të vitit 2023 dhe ishte mbajtur në paraburgim nën dyshimet për keqpërdorim të pozitës, ushtrim të ndikimit dhe konflikt interesi.

Ai ishte liruar në shtator 2023.