Lirim Mehmetaj: Bedri Hamza e ka mundësinë të bëhet hero i Kosovës

Gazetari Lirim Mehmetaj ka bërë një analizë mbi mundësitë e opozitës nëse arrin të formojë qeverinë dhe Bedri Hamza bëhet kryeministër i Kosovës.

Në një postim në Facebook, Mehmetaj ka renditur disa nga reformat që, sipas tij, do ta shndërronin Hamzën në një figurë historike për Kosovën.

Sipas Mehmetajt, nëse qeveria e udhëhequr nga Hamza përfundon autostradën për Gjilan dhe rrugët për Mitrovicë, Podujevë, Pejë e Gjakovë, ndërton unazën e Prishtinës dhe të paktën tre stadiume të reja në qytetet e Kosovës, atëherë ai do të bëhej një lider me ndikim të madh, shkruan Jepi zë.

Po ashtu, Mehmetaj përmend rritjen e pagave për shërbyesit civilë, dyfishimin e pensioneve dhe të ardhurave për skemat sociale, dixhitalizimin e shkollave dhe krijimin e një sistemi funksional të sigurimeve shëndetësore.

Një pikë tjetër e rëndësishme që ai përmend është largimi i sanksioneve ndaj Kosovës dhe pastrimi i listave të veteranëve, duke rritur pensionet për ta.

Sipas tij, të gjitha këto reforma janë të mundshme dhe e ardhmja e Kosovës varet nga vendimet e duhura.