Qeveria e konfirmon, Kurti ka qenë i njoftuar se po planifikohej vrasja e tij

Zyra e Kryeministrit është deklaruar pas raportimeve se ndaj Albin Kurtit po planifikohej një atentat. Atentati, sipas ZKM-së, dyshohet të jetë planifikuar në vitin 2021 dhe për këtë Kurti ishte njoftuar nga AKI-ja.

“Kryeministri i Republikës së Kosovës, Albin Kurti ka qenë i njoftuar për këtë rast nga Agjencia e Kosovës për Inteligjencë. Institucionet e sigurisë i kanë ndërmarrë të gjitha masat për parandalimin e këtij veprimi. Rasti nuk është bërë publik për të mos përhapur panik.”, thonë nga Zyra e Kryeministrit.

Në bazë të raportimeve të mediave në Shqipëri, njësia kundër-terrorizmit e Policisë së Kosovës kishte marrë informacione nga burime të inteligjencës për plane për vrasjen e tre personave: Albin Kurtit, Xhavit Halitit dhe Ismet Haxhës. Haliti, deputet i subjektit opozitar Partisë Demokratike të Kosovës, ka konfirmuar për Sinjalin se ka pranuar informacione për kërcënime ndaj jetës së tij.

Ndërkaq, Ismet Haxha është ish-pjesëtar i Shërbimit Informativ të Kosovës (SHIK). Vrasja e këtyre tre figurave ishte planifikuar me qëllim, siç thuhet në dokumentin të cilit i referohen mediat në Shqipëri, “të destabilizimit të Kosovës”.

Sipas raportimeve, Prek Kodra, shtetas i Shqipërisë, dyshohet se ka planifikuar vrasjen e tyre. Ai po ashtu, sipas një dokumentit, ka qenë i dyshuar për përfshirje në disa vrasje në Kosovë dhe Mal të Zi. Ky dokument thuhet se është publikuar nga hakerët që kanë sulmuar ueb-faqet e institucioneve shqiptare në korrik dhe në shtator të këtij viti. Shqipëria ka fajësuar Iranin për sulmet kibernetike dhe ka ndërprerë raportet diplomatike me Teheranin.